африқадики 46 дөләт вирусниң еғир тәһдити астида қалди

дунйада вухән вируси (Kovid-19) сәвәбидин җенидин айрилғанлар 34 миңдин, йуқумланғанлар 735 миңдин ешип кәтти.

1387829
африқадики 46 дөләт вирусниң еғир тәһдити астида қалди

түркийә авази радийоси хәвири: вухән вируси тунҗи болуп отуриға чиққан хитайда, йеқинқи 24 саәттә төт киши җенидин айрилди вә җәмий җенидин айрилғанлар 3 миң 304 кә, йуқумланғанлар 81 миң 470 кә йәтти.322 киши дохтурханидин чиқти вә саламәтлики йахшиланғанларниң сани 75 миң 770 кә йәтти. 20 өлкидә йеқинқи төт һәптидә дөләт ичини мәнбә қилған вухән вирусиға мунасивәтлик йеңи вәқә көрүлмиди.

җәнубий корейәдә вухән вируси сәвәбидин 158 киши җенидин айрилди, йуқумланғанлар 9 миң 661 ға йәтти. йуқумланған 5 миң 228 кишиниң саламәтлики йахшиланди вә дохтурханидин чиқти.

йапонийәдә вирусқа мунасивәтлик өлүм 67 гә, йуқумланғанлар 2 миң 608 гә йәтти. йаоонийәниң даңлиқ комидийә артислиридин кен шимура 70 йешида вирус сәвәблик аләмдин өтти.

җәнубий корейә һөкүмити вухән вирусиға қарши туруш тәдбирлири рамкисида, чаршанбә (2020-йили 1-апрел) күнидин башлап чәт әлдин кәлгәнләрниң «икки һәптә мәҗбурий карантин астиға елинидиғанлиқи» ни уқтурди.

иранда йеқинқи 24 саәттә вухән вируси сәвәбидин җенидин айрилғанлар 117 киши ешип 2 миң 757 гә, йуқумланғанлар 3 миң 186 киши ешип 41 миң 495 кә чиқти. 3 миң 511 бемарниң әһвалиниң еғир икәнлики, 13 миң 911 кишиниң саламәтликиниң йахшилинип дохтурханидин чиққанлиқи қәйт қилинди.

сүрийәдә вухән вирусиға мунасивәтлик тунҗи өлүм көрүлди. тоққуз кишиниң йуқумланғанлиқи билдүрүлди.

маракәштә вухән вируси байқалған 17 айлиқ бир бовақ җенидин айрилди, җәмий җенидин айрилғанлар 27 гә, йуқумланғанлар 450 кә чиқти.

алҗирийәдә йеқинқи 24 саәттә икки киши җенидин айрилди, 57 киши йуқумланди. җәмий җенидин айрилғанлар 31 гә, йуқумланғанлар 511 гә йәтти.

исираилийәдә вухән вируси сәвәбидин җенидин айрилғанлар 16 гә, йуқумланғанлар 4 миң 347 гә йәтти. 74 бемарниң әһвалиниң еғир икәнлики, 89 кишиниң йахшиланғанлиқи қәйт қилинди.

баш министир нетанйаһуниң парламент мәслиһәтчиси рифка павлух (Rivka Paluch) ниң йуқумланғанлиқиниң дәлилләнгәнлики билдүрүлди, әмма саламәтликигә мунасивәтлик мәлумат берилмиди.

пәләстиндә йеңидин йәттә кишидә вухән вирусиниң байқилиши билән, бу сан 115 кә чиқти. пәләстин һөкүмити қизил кирест җәмийитидин исираилийә түрмилиридики пәләстинлик мәһбусларни йуқумлиништин қоғдашни тәләп қилди. исираилийә түрмилиридә 43 айал, 180 кичик бала вә 700 түрлүк кесәл болуп, җәмий 5 миң пәләстинлик мәһбус бар.

русийәдә болса, тоққуз киши җенидин айрилди, 836 киши йуқумланди.

вухән вируси сәвбидин 25 киши җенидин айрилған, 979 киши йуқумланған һиндистанда, баш министир моди һөкүмәт вирусниң тарқилишиниң алдини елиш үчүн йолға қойған қаттиқ тәдбирләр сәвәблик оттуриға чиққан қийинчилиқлар түпәйлидин хәлқтин әпу сориди.

у: «бәзи кишиләрниң маңа аччиқлинидиғанлиқини билимән, әмма бу қаттиқ тәдбирләр мәзкур урушта ғәлибә қилиш үчүн зөрүр» деди.

африқа қитәсидики буркина фасода вухән вирусиға мунасивәтлик тунҗи өлүм көрүлди. қатнаш вә йол бихәтәрлики министири  висан дабигу (Vincent Dabilgou) ниң йуқумланғанлиқи билдүрүлди. буниңдин бурун ташқи ишлар министири вә маарип министирини өз ичигә алған бәш министирниңму йуқумланғанлиқи билдүрүлгән болуп, 12 киши җенидин айрилған иди.

ғәрбий африқаға җайлашқан сенегалда вухән вируси билән йуқумланғанлар 12 киши ешип 115 кә чиқти. 27 кишиниң саламәтлики йахшиланди.

бир киши җенидин айрилған нигерийәдә һазирғичә 97 киши йуқумланди. пайтәхтни өз ичигә алған үч иштатта бүгүн (2020-йили 30-март) дин башлап 14 күнлүк кочиға чиқишни чәкләш йолға қойулди.

анголада вирусқа мунасивәтлик тунҗи өлүм көрүлди. тәхминән икки һәптә илгири португалийәдин қайтқан икки ангола пуқраси вирус сәвәбидин җенидин айрилди. һазирғичә йәттә киши йуқумланған болуп, дөләт миқйасида миңдин артуқ киши карантин астида турмақта.

кенийәдә йуқумланған парламент әзаси камоти мвамкале (Kamoti Mwamkale) билән учрашқанлиқидин саламәтликидин гуманланған 50 тин артуқ парламент әзаси вә парламент хизмәтчиси сәһийә министирлиқиға саламәтликини тәкшүрүтүш үчүн илтимас сунди. қаттиқ тәдбирләр елинған бу дөләттә 42 киши йуқумланди.

мисирда болса, җенидин айрилғанлар 40 қа, йуқумланғанлар 609 ға йәтти.

туниста җенидин айрилғанлар сәккизгә, йуқумланғанлар 312 гә йәтти.

ийорданийә сәһийә министири саад җабир вухән вирусиға мунасивәтлик үчинчи өлүмниң әмәлгә ашқанлиқини, йеңидин 13 кишидә вирусниң байқалғанлиқини вә бу санниң 259 ға йәткәнликини, 18 кишиниң дохтурханидин чиққанлиқини билдүрди.

ливанда йеқинқи 24 саәттә бир киши җенидин айрилди вә бу сан 11 гә чиққан болди. сәккиз кишиниң йеңидин йуқумланғанлиқи вә бу санниң 446 ға чиққанлиқи елан қилинди.

қатарда бүгүнгичә бир киши җенидин айрилди, йеңидин 44 киши йуқумланди вә бу сан 634 кә чиқти.

африқа қитәсидә йавропа дөләтлиридин кәлгән кишиләр сәвәблик 46 дөләттә вухән вируси тарқалди. бу қитәдә вирус байқалған 2020-йили феврал ейидин башлап 150 киши җенидин айрилди, 5 миңға йеқин киши йуқумланди.

әзәрбәйҗанда йеңидин 64 киши йуқумланди вә бу сан 273 кә чиқти.   



مۇناسىۋەتلىك خەۋەرلەر