mayk pompéyo xitay bilen iranning wuxen wirusigha tutqan pozitsiyesini qattiq tenqid qildi

amérika tashqi ishlar ministiri mayk pompéyo xitay we iranning (Kovid-19) wuxen wirusi yuqumluq apitige tutqan pozitsiyelirini qattiq tenqid qildi.

1385048
mayk pompéyo xitay bilen iranning wuxen wirusigha tutqan pozitsiyesini qattiq tenqid qildi

türkiye awazi radiyosi xewiri: «Newsweek» ning xewer qilishiche, mayk pompéyo toniy pérkinsning sahibxanliqidiki bir radiyo pirogrammisida, xitay we iran emeldarlirini wuxen wirusi yuqumluq apitining éghirliqini yoshurushqa tirishish we mesuliyitidin qéchishqa urunush arqiliq insanlarning hayatini xeterge ittirish bilen eyibligen.

pompéyo xitay we iranda xelqning ochuq - ashkara  bolush we yaxshi bashqurushning kemchiliki sewebidin ziyangha uchrighanliqini otturigha qoyup: «bu döletlerdiki xelqlerning bu mesilide haman bir küni rehberlirini jawabkarliqqa tartidighanliqigha ishinimen» dédi.

pompéyo rusiye, xitay we iranning bu mesilide xata melumat tarqitish seperwerliki élip barghanliqlirini bildürüp: «ular bu wirusning amérika armiyesidin kelgenlikini, belkim italiyede peyda bolghanliqini sözlep yürishidu, bularning hemmisi mesuliyettin qéchishtin bashqa nerse emes» dédi.

pompéyo xitayning yuqumluq apetning üstini yögeshni dawamlashturup, téximu köp yuqumlinishning aldini élish yaki bundaq ishning qayta yüz bérishining aldini élish üchün kéreklik uchurlardin dunyani mehrum qilghanliqini tekitlidi.

amérikaning xitay we iran bilen bolghan eslidinla yirik munasiwetliri wuxen wirusi  yuqumluq apiti sewebidin bolushigha nacharlashqan bir peytte, amérika prézidénti donald tramp we amérika emeldarlirining bu késelni «xitay wirusi» yaki «wuxen wirusi» dep atishigha qarita xitay qattiq naraziliq bildürgen idi.

amérika palatasighimu wuxende otturigha chiqqan yuqumluq apetni xitay hökümitining yoshurghanliqini tekshürüshni öz ichige alghan  qanun teklipi layihesi sunulghan idi.

xitay amérikagha «wuxen wirusigha qarshi küreshte bashqa döletlerni eyiblimeslik we yuqumluq apetni siyasiylashturmasliq» chaqiriqida bolghan idi.

xitay tashqi ishlar ministirliqi bayanatchisi géng shuang amérikani «bashqilarning inawitige buzghunchiliq qilish we mesuliyettin qéchish üchün qurbanliqqa öchke izdesh» bilen eyibligen idi.

iran inqilab muhapizetchiliri qisimining qomandani hüseyin selamimu yuqumluq apetning amérikaning biologiyelik hujumi bolushi mumkinlikini éytqan idi.


خەتكۈچ: wuxen wirusi , xitay , mayk pompéyo

مۇناسىۋەتلىك خەۋەرلەر