америка: түркийә - сүрийә чеграсиға әскәр турғузуш нийитимизму, пиланимизму йоқ

америка армийәси баш иштаб башлиқи генерал - полковник марк миллей, дөлитиниң сүрийәниң шәрқий шималидики түркийә чеграсиға йеқин районларда қайтидин әскәр турғузуш пиланиниң йоқлуқини билдүрди.

америка: түркийә - сүрийә чеграсиға әскәр турғузуш нийитимизму, пиланимизму йоқ

түркийә авази радийоси хәвири: америка армийәси баш иштаб башлиқи генерал - полковник марк миллей, америка мудапиә министири марк еспер билән бирликтә авам палата қораллиқ хизмәтләр комитетида палата әзалириниң 2021 – йиллиқ мудапиә хамчотиға алақидар соаллириға җаваб бәрди.

«американиң сүрийәдики һәрбий мәвҗудийити» тоғрисидики бир соалға җаваб бәргән миллей, түркийә армийәсиниң сүрийәдики тинчлиқ булиқи һәрбий һәрикитидин илгири у райондики алаһидә қисим җәңчилириниң чекингәнликини, чегра районлиридики әскәрләрниң шәрқ тәрәпкә йөткәлгәнликини хатиритип өтти вә сөзини давамлаштуруп, «сүрийәдики вәзипимиз өзгәрмиди. вәзипимиз сүрийәниң шималида даешқа қарши қилинидиған күрәшләрдур. түркийә – сүрийә чеграсиға иккинчиләп әскәр орунлаштуруш мәсилисидә нә нийитимиз, нә пиланимиз йоқ» дегәнләрни қәйт қилди.

министир епсерму американиң нөвәттики вәзиписиниң пәқәт сүрийәниң шәрқий қисмидики нефитликләрдә даеш террорлуқ тәшкилатиниң қайтидин оттуриға чиқишиниң алдини елиш икәнликини тәкитләп, «һазирқи әһвалдин қариғанда чегра райониға әскәр әвәтишимизниң мумкинчилики бардәк қилмайду» деди.

еспер, бир палата әзасиниң «американиң сүрийәниң ички урушиға қайта арилишип – арилашмайдиғанлиқи» тоғрисидики соалиға «бу һәқтә бирәр дәталаш йоқ» дәп җаваб бәрди.

америка, сүрийәниң шәрқидә сүрийә демократик күчлири дегән исимни ишлитиватқан й п г / п к к бөлгүнчи террорлуқ тәшкилатиға һәмдәм болуш мәқситидә 600 әскәр турғузмақта.



مۇناسىۋەتلىك خەۋەرلەر