трампниң йешил карт бәлгилимиси тәстиқланди

америка алий соти пирезидент трамп һөкүмити тәрипидин чиқирилған «американиң йардәмлиригә тайинип қалидиғанлиқи җәзмләшкән кишиләрниң йешил карт илтимасини рәт қилиш қарари» ни тәстиқлиди.

трампниң йешил карт бәлгилимиси тәстиқланди

түркийә авази радийоси хәвири: мәзкур қарар авазға қойулуп, 4 кә қарши қарши 5 аваз билән тәстиқланди.

қарар бойичә болғанда, америкада йашаш үчүн йешил картқа илтимас қилған кишиләр «америка дөлитигә йүк болуп қалидиған-қалмайдиғанлиқи нуқтисида» иқтисадий баһалаштин өткүзүлиду. буниңдин бурун америкадин сәһийә, өй иҗариси йардими вә йемәк-ичмәк йардими алған йаки кейин «бундақ йардәмләрни алиду» дәп пәрәз қилинған кишиләргә йешил карт берилмәйду. йешил карт илтимаслири көч идариси мәсуллири тәрипидин тәкшүрүлиду.

йешил картқа илтимас қилған кишиләрниң қандақ иқтисадий тәкшүрүштин өткүзүлидиғанлиқи тоғрисида мәлумат берилмиди.

пирезидент трамп һөкүмитидин бурунқи һөкүмәтләрдә илтимасни баһалаш ишлири, нәқ пул йардимигә асасән елип берилатти. трамп һөкүмити болса, бу бәлгилимини кеңәйтип, сәһийә, өй иҗариси йардими вә йемәк-ичмәк йардәмлиригә тайиниш дәриҗисиниму баһалаш даирисигә киргүзди.

пирезидент трамп йешил карт бәлгилимиси үстидә тохталғанда, «лайақәткә тайанған көчмәнлик түзүмини кәлтүргәнликлири» ни билдүрүп, кишиләрниң иқтидар-қабилийәтлирини вә мәдәнийәт сәвийәсини асас қилған түзүм сайисида, америкаға җинайәтчи йаки қанунсиз қилмишларға арилашқан кишиләрниң келишиниң алди елинидиғанлиқини илгири сүргән иди.



مۇناسىۋەتلىك خەۋەرلەر