ruhani: ayropilanni chüshürüwétish kechürüshke bolmaydighan xataliqtur

iran pirézidénti hesen ruhani, ukraina hawa yolliri shirkiti yoluchilar ayropilanining iran hawa mudapie sistémiliri teripidin chüshürüwétilishining «kechürüshke bolmaydighan xataliq ikenliki»ni bildürdi.

ruhani: ayropilanni chüshürüwétish kechürüshke bolmaydighan xataliqtur

türkiye awazi radiyosi xewiri: iran pirézidénti hesen ruhani, ukraina hawa yolliri shirkiti yoluchilar ayropilanining iran hawa mudapie sistémiliri teripidin chüshürüwétilishining «kechürüshke bolmaydighan xataliq ikenliki»ni bildürüp, bu mesilini yéqindin közitishni dawamlashturidighanliqini éytti.

iran dölet téléwiziye qanilining xewer qilishiche, ruhani téhranda söz qilip, «ayropilanning chüshüp kétishide bir binormalliq bar dep oylap, ayropilanning qandaq chüshüp ketkenlikige dair tekshürüshning eng qisqa waqit ichide netijilendürülüshini telep qildim. kechürüshke bolmaydighan bir xataliq barliqi otturigha chiqqanda bolsa, bu heqte derhal jamaetchilikke melumat bérish toghrisida yolyoruq chüshürdum» dédi we sözini dawamlashturup, «wede qilimenki, hökümet bu mesilining aydinglitishini yéqindin közitidu. edliye bashqarmisi, yuqiri derijilik bir sodiyening bashchiliqida bir alahide sot mehkimisi qurushi kérek. bu, adettiki bir délo emes we pütkül dunyaning neziri bu mehkimining üstide bolidu» dégenlerni qeyt qildi.

8 – yanwarda téhran imam huseyin xelqara ayrodurumidin ukrainaning paytexti kiéwgha qarap yolgha chiqqan ukraina hawa yolliri shirkitining boyéng 737 tipliq yoluchilar ayropilani qozghilip uzun ötmeyla chüshüp kétip, ayropilandiki 176 adem jénidin ayrilghanidi.

ayropilanning iran armiyesi teripidin bomba étip chüshürüwétilgenliki toghrisidiki qarashlarni ret qilghan téhran dairiliri, weqe yüz bérip 3 kün ötkendin kéyin yoluchilar ayropilanining «kruz (seyr) bombisi» dep qarilip, qisqa musapilik bashqurulidighan bomba bilen sewenlik bilen chüshürüwétilgenlikini étirap qilghanidi.


خەتكۈچ: ayropilan , ukraina , ruhani , iran

مۇناسىۋەتلىك خەۋەرلەر