qatar emiri iranni ushtumtut ziyaret qildi

iran rehbiri eli hamenéy rayonning bügünki ehwaligha, amérika bilen ittipaqdashlirining chiqarghan fitne-pasatlarning seweb bolghanliqini éytti.

qatar emiri iranni ushtumtut ziyaret qildi

türkiye awazi radiyosi xewiri: qatar emiri sheyx temim bin haméd alsani tünügün (12-yanwar) téhranni ushtumtut ziyaret qilip, iran rehbiri eli hamenéy bilen körüshti.

eli hamenéyning ishxanisi élan qilghan bayanatqa asaslanghanda, iran rehbiri eli hamenéy rayonning bügünki ehwaligha, amérika bilen ittipaqdashliri chiqarghan fitne-pasatlarning seweb bolghanliqini bildürüp: «rayon döletliri chet elliklerning éytqanlirigha qulaq salmasliqi lazim» dédi.

u iranning bir qanche qétim rayon döletliri bilen yéqin hemkarliq ornitishqa teyyar ikenlikini élan qilghanliqini we pirézidént hesen ruhaniningmu buni nahayiti ochuq otturigha qoyghanliqini eskertip: «elwette, dunyaning bir chétidin rayongha kelgenler, rayon döletlirining özara hemkarliqlirining tereqqiyatini xalimaydu, emma bu mesile ulargha munasiwetsiz. rayon döletliri we xelqliri emdi bundaq zorlashlarni we arilishishlarni qobul qilmaydu» dédi.

u rayonning muwapiq shertlerge ige emeslikini bildürüp: «amérika we ittipaqdashlirining chiqarghan fitne-pasatliri, bügünki shertlerning sewebi. rayon arisida ornitilidighan hemkarliqlar, buninggha qarshi turushning birdinbir yoli» dédi.

qatar emiri sheyx temim bin haméd alsani iran rehbiri eli hamenéyning rayon döletliri otturisida hemkarliqlarni tereqqiy qildurush toghrisidiki qarashlirigha qoshulidighanliqini bildürüp: «rayon döletliri otturisida keng dairilik muzakire ötküzülüshining zörürlükige ishinimiz» dédi.  



مۇناسىۋەتلىك خەۋەرلەر