iran tehditlirini dawamlashturmaqta

türkiye awazi radiyosi xewiri: ebulfazil shikarchi pars xewer agéntliqigha bergen bayanatida, washington hökümiti herbiy nuqtilirini rayondin chékindürgiche jeng meydanida turidighanliqlirini bildürdi.

u amérikaning muweppeqiyetlik mudapie sistémisining yoqluqini, bashqurulidighan bombilarning eng chong, esliheliri toluq bolghan bazigha chüshüshining aldini alalmighanliqini ilgiri sürüp, bu ehwalning rayonda amérika bilen birlikte heriket qiliwatqan döletler üchün sawaqqa ige ikenlikini qeyt qildi.

u: «bügün (tünügün, 8-yanwar) qilinghan hujumlarni intiqamning hemmisi dep qarimaymiz. heqiqiy intiqam shundaq sewiyede boliduki, amérikaliqlar hemme nersilirini toplap rayondin kétishke mejbur bolidu» dédi.

u hujumdin burun amérika bilen iranning masliship heriket qilghanliqi we bu sewebtin herbiy bazilarning boshitilghanliqi toghrisidiki gep-sözler üstide toxtilip: «bu külkilik yalghandur. pirinsip jehettin éytqanda, düshmenge testek étish rohigha zit. amérikani qatil düshmen süpitide körimiz. amérikaliqlar nishanigha yétish üchün yalghanni toquwatidu» dédi.

u téhranda chüshüp ketken ukraina yoluchilar ayropilani weqesi heqqidimu toxtaldi. u ayropilanning bashqurulidighan bomba bilen étip chüshürülgenliki heqqidiki qarashlarning toghra emeslikini eskertip, buning pisxologiyelik urushning bir parchisi ikenlikini we amérikaning menpeetini qoghdaydighanlar teripidin otturigha chiqirilghanliqini ilgiri sürdi.