jonson parlaméntqa xitab qildi
engliye bash weziri boris jonson muddettin burun ötküzülgen omumiy saylamdin kéyin shekillengen parlaméntqa tunji qétim xitab qildi.

türkiye awazi radiyosi xewiri: yéqinda ötküzülgen saylamda engliye parlaméntining 650 orunduqluq töwen qaniti awam palatasigha 365 parlamént ezasini kirgüzeligen jonson, xitabida mundaq dédi: «siler qandaq oylawatisiler, bilmeymen, bu yerde bolmighanlarghimu bihörmetlik qilishni xalimaymen, emma méningche bu parlamént aldinqisigha qarighanda nechche hesse yaxshi. parlaméntimiz jüme küni dölitimizning yawropa ittipaqidin ayrilishigha alaqidar qanun layihesi heqqide muzakire élip baridu. ishinimenki, xelqimizning parlaménti bolghan bu yéngi parlaméntimiz yawropa ittipaqidin ayrilish nishanimizni ishqa ashuridu. andin nöwet, sehiye sistémisi, maarip, bixeterlik qatarliq xelq eng köngül bölidighan mesililerni hel qilish yolida qedem tashlashqa kélidu.»
shotlandiye rayonluq hökümitidin kelgen yéngi musteqilliq xelq rayini sinash telepliri toghriliqmu toxtalghan jonson, mundaq dep körsetti: «menmu, bu parlaméntning shan – shereplik ezalirimu shuninggha qetiy ishiniduki, dölitimizni parchilash chaqiriqlirigha qetiy qarshi turimiz. ésil pezilitimiz we hörmitimizni chöridigen halda hemkarliq sépini téximu mustehkemlesh we birlikimizni qoghdash parlaméntimizning menggü bash tartalmaydighan muqeddes burchidur.»