bash elchi 10 dollarliq kitab oghrilash bilen eyiblendi
méksika tashqi ishlar ministiri markélo ébrard 10 dollarliq kitab oghrilash bilen eyiblengen méksikaning buénos eyrésta turushluq bash elchisi oskar rikardo waléroning derhal qayturup kélingenlikini élan qildi.
türkiye awazi radiyosi xewiri: méksika tashqi ishlar ministiri markélo ébrard tiwittér hésabida élan qilghan bayanatida, «intizam tekshürsh komitétining ataqliq bir kitabxanidin kitab oghrilash bilen eyiblengen argéntinada turushluq bash elchining ehwalini tekshürüshini teleb qildim we öziningmu qaytip kélishi heqqide buyruq chüshürdüm. eger körünüshlerning toghra ikenliki testiqlansa, wezipisidin élip tashlinidu. saxtipezlikke qetiy yol qoyulmaydu» dédi.
argéntina metbuatlirida tarqitilghan körünüshlerde, 76 yashliq bash elchining 26 – öktebirde buénos eyrésning eng ataqliq kitabxaniliridin «él aténiyo girand sipléndid» te, ishkaptin alghan bir kitabni gézitning arsigha qoyghanliqi we pulini tölimestin chiqip ketmekchi bolghanliqi, derwazidin chiqidighan chaghda dokkan signali chélinghandin kéyin, bixeterlikni saqlash xadimliri teripidin tosup qilinghanliqi körünidu.
bixeterlikni saqlash xadimi oskar rikardo waléroning talunini sürüshte qilip, kitabning sétiwilinmighanliqini bayqighandin kéyin, ehwalni saqchigha melum qilidu, saqchilar méksika bash elchisi heqqide délo turghuzidu.
bash elchi heqqide oghriliq jinayiti bilen délo échilghan bolsimu, biraq argéntinada bash elchiler diplomatik heq – hoquqqa ige bolghanliqi yüzisidin nazaretke élinishqa we sotqa chiqirilishqa bolmaydu shundaqla jazasimu epu qilinidu.
méksika bash elchisi oskar rikardo waléro oghrilash bilen eyiblengen kitabning qimmiti 10 dollar bolup, firansiyelik tarixshunas guy nogorét teripidin yézilghan «oyunperes, pashiwaz giakomo kasanowaning terjimehali» dégen kitab ikenliki bildürüldi.
