فىرانسىيەدە كەڭ كۆلەملىك ئىش تاشلاش باشلاندى

تۈركىيە ئاۋازى رادىيوسى خەۋىرى: تۈنۈگۈن (5-دېكابىر) ئوخشىمىغان نۇرغۇن ساھەلەردە خىزمەت قىلىدىغان 500 مىڭ كىشى، سېرىق جىلىتكىلىكلەرنىڭ بىر يىلدىن ئارتۇق داۋام قىلغان نامايىشلىرىدىن كېيىن، ماكرون ھۆكۈمىتىنىڭ پېنسىيە ئىسلاھاتىغا نارازىلىق كۆرسىتىش مەقسىتىدە مەملىكەت مىقياسى بويىچە مۇددەتسىز ئىش تاشلاشنى باشلىدى.

پايتەخت پارىژ، ليون، نانتېس ۋە رېننېس قاتارلىق نۇرغۇن شەھەرلەردە نامايىشچىلار بىلەن ساقچىلار ئوتتۇرىسىدا سۈركىلىش يۈز بەرگەنلىكى بىلدۈرۈلدى.

نارازىلىق قوزغىغان پېنسىيە ئىسلاھاتى، مەمۇر ۋە ئىشچى دەپ ئايرىماستىن ئارتۇقچىلىقلارنى ئەمەلدىن قالدۇرۇشنى، پېنسىيە يېشىنى قەدەممۇ قەدەم 62 دىن 64 كە چىقىرىشنى مەقسەت قىلىدۇ.

 بۇنىڭ ئونلارچە ساھەدە سەلبىي تەسىر پەيدا قىلىدىغانلىقى پەرەز قىلىنماقتا.

نارازىلىقلىرىنى ئەنئەنە بويىچە ئىش تاشلاش ۋە نامايىش قىلىش بىلەن ئىپادىلىگەن فىرانسىيە خەلقى، بۇنىڭدىن بۇرۇنمۇ نۇرغۇن قېتىم ئىش تاشلىغان ئىدى. 1995-يىلى ئۈچ ھەپتە داۋاملاشقان ئىش تاشلاش يۈز بەرگەن بولۇپ، دۆلەت مىقياسىدا كۈندىلىك تۇرمۇش پالەچ ئەھۋالغا چۈشۈپ قالغان ئىدى.