iran dölet téléwiziyesi bezi namayishchilarning saqchilar teripidin öltürülgenlikini étirap qildi

iran dölet téléwiziyesi namayishlar jeryanida, amanliqni saqlash qisimliri terepidin bezi kishilerning öltürülgenlikini étirap qildi.

iran dölet téléwiziyesi bezi namayishchilarning saqchilar teripidin öltürülgenlikini étirap qildi

türkiye awazi radiyosi xewiri: iran dölet téléwiziyesi bénzin bahasining östürülishige naraziliq bildürüsh üchün ötküzülgen namayishlar jeryanida, amanliqni saqlash qisimliri bilen qoraliq toqunush qilghanliqi ilgiri sürülgen bezi kishilerning öltürülgenlikining toghra ikenlikini étirap qildi.

iran dölet téléwiziyesining engliyedin farische tarqitilidighan téléwiziye qanallirining namayishta oynighan roligha alaqidar xewiride, mah shehir, shiraz we behbexan sheherliride «malimanchilar» dep baha bérilgen bir guruppa namayishchining saqchilar teripidin öltürülgenliki bildürüldi.

iran dölet téléwiziyesining xewiride, «qoralliq bölgünchi» guruppining bezi yollarni tosqanliqi we sheherdiki néfit - xémiye zawutigha kirip, zawutni partlatmaqchi bolghanliqi ilgiri sürüldi.

xewerde yene, «mah shehirdimu bir saetkiche qoralliq <malimanchilar> toqunush bashlatti.  bundaq weziyette amanliqni saqlash qisimliri xelqning bixeterlikini qoghdash üchün heriketke ötti» dégen sözler ishlitildi. 

xewerde tinch namayishlargha qatnashqan bezi puqralarning bolsa, kimliki namelum gumanliq kishiler teripidin étip öltürülgenliki ilgiri sürüldi.

xelqara kechürüm teshkilati, namayish jeryanida az dégendimu 208 kishining jénidin ayrilghanliqini we eslide ölgenler sanining texmin qilinghandinmu köp ikenlikini élan qildi.

xelqara kechürüm teshkilati teripidin élan qilinghan yazma bayanatta, bu ölümlerge jawapkar kishilerning hésab bérishi kérekliki bildürülüp, buning üchün xelqara jamaetchilik yardemge chaqiriq qilindi.

amérikaning émbargoliriningmu tesiride iqtisadi jehettin éghir künlerni bashtin kechüriwatqan iran xelqi, 15 – noyabirda bénzin bahasining östürülgenliki jakarlanghandin kéyin, keng – kölemlik namayish bashlighan idi.

iranning nurghunlighan sheherliride 3 küngiche dawamlashqan namayishlar esnasida hökümet binaliri, bankilar we may qachilash ponkitliri ziyangha uchritilghan, hemde 7000 kishi nazaretke élinghan idi.

 


خەتكۈچ: namayish , iran

مۇناسىۋەتلىك خەۋەرلەر