erdoghan nato bashliqlar yighinigha ishtirak qilish üchün engliyege qarap yolgha chiqti

jumhur reis rejep tayyip erdoghan, shimaliy atlantik ehdi teshkilati – nato qurulghanliqining 70 yilliqini xatirilesh munasiwiti bilen londonda ötküzülidighan nato bashliqlar yighinigha ishtirak qilish üchün bügün engliyege qarap yolgha chiqti.

erdoghan nato bashliqlar yighinigha ishtirak qilish üchün engliyege qarap yolgha chiqti

türkiye awazi radiyosi xewiri: erdoghan engliyege qarap yolgha chiqishtin ilgiri ayrodurumda bayanat bérip, dewrimizning tehditlirini nezerde tutup, natoda yéngilash élip bérishning muqerrer ikenlikini tekitlidi.

«rusiye bilen bolghan munasiwetlirimiz, ittipaqdashlirimiz bilen bolghan munasiwetlirimizning ornigha qoyulmaydu» dégen erdoghan, türkiyening natoning waz kéchishke bolmaydighan bir shériki ikenlikini qeyt qildi.

jumhur reislik mehkimisi uchur – alaqe ishliri idarisining bildürüshiche, 3 – dékabirdin 5 – dékabirghiche engliyede ötküzülidighan nato bashliqlar yighinigha türkiyedin jumhur reis erdoghan bilen birlikte, tashqi ishlar ministiri mewlüt chawushoghlu, xezine we maliye ishliri ministiri berat albayraq we dölet mudapie ministiri xulusi aqar qatarliqlarmu ishtirak qilidiken.

yighinda, nato zéminlirigha munasiwetlik térrorizmni öz ichige barliq xewp we sinaqlargha qarita birlik we hemkarliq ichide heriket qilishning ehmiyiti qatarliqlarning tekitlep ötülüshi pilanlanmaqta.

yighinda yene, natoning nöwettiki xewpsizlik sharaitigha mas heriket qilish jehette qolgha keltürülgen ilgirileshlerningmu muhakime qilinishi, lidérlarning natoning 2020 – yiligha teyyar haletke keltürülüshi üchün teklip bérishi, yighindin kéyin «london xitabnamisi» ning élan qilinishi kütülmekte.

jumhur reis erdoghanning yighin dairiside bir qisim ishitrakchi döletlerning dölet we hökümet bashliqliri bilen ayrim körüshüshi pilanlamaqta؛ erdoghan yene, ziyaret munasiwiti bilen türkiye, engliye, firansiye we gérmaniye rehberlirining töt terep yighinigha ishtirak qilidu. yighinda süriye, liwiye qatarliq rayonluq mesililer muzakire qilinidu.

jumhur reis erdoghan ziyaritining axirqi künide kambérj jamesini xizmetke kirishtürüsh murasimigha qatnishidu.


خەتكۈچ: nato , engliye , erdoghan , türkiye

مۇناسىۋەتلىك خەۋەرلەر