шинзу аби хитайни хоңкоңниң алаһидә орниға һөрмәт қилишқа чақирди

йапонийә баш вәзири шинзу аби хитайни хоңкоңниң алаһидә мәмурий районлуқ салаһийитигә һөрмәт қилишқа чақирди.

1312127
шинзу аби хитайни хоңкоңниң алаһидә орниға һөрмәт қилишқа чақирди

түркийә авази радийоси хәвири: йапонийә кйодо агентлиқиниң хәвиридә билдүрүлишичә, ички кабент катипи суга йошиһидә баш вәзир шинзу абиниң хитай ташқи ишлар министири ваң йи билән көрүшкәнлики тоғрисида байанат елан қилған.

суга йошиһидә байанатида, баш вәзир шинзу абиниң көрүшүштә: «хоңкоңниң <бир дөләт, икки хил түзүм> пиринсипи астида тәрәққий қилишиға рухсәт қилинишини, районда әркин вә очуқ-ашкара сийасий түзүмниң давамлаштурулуши керәкликини тәкитлигәнликини» билдүргән.

 G20 дөләт гуруһи ташқи ишлар министирлири йиғини үчүн өткән һәптә йапонийәгә кәлгән хитай ташқи ишлар министири ваң йи, инсанпәрвәрлик вә мәдәнийәт мунасивәтлириниң тәрәққий қилдурулушини мәқсәт қилған йапонийә-хитай йуқири дәриҗилик дийалог йиғиниғиму қатнашти.

йиғинда, йапонийәлик мухбирлар ваң йидин йәкшәнбә (2019-йили 24-нойабир) күни хоңкоңда өткүзүлгән йәрлик сайламларда бейҗиңға қарши өктичиләрниң ғәлибә қилғанлиқиға қандақ қарайдиғанлиқи һәққидә соал сориған.

ваң йи: «хоңкоңда немә болушидин қәтийнәзәр, хитайниң бир парчиси болуши давамлишиду» дәп җаваб бәргән.

мухбирлар йәнә, 2019-йили ийун ейидин буйан давам қиливатқан вә йеқинқи һәптиләрдә намайишчилар билән сақчилар оттурисида тоқунушларға сәһнә болған намайишлар тоғрилиқму соал сориған.

ваң йи намайиш тоғрисидики соалға: «хоңкоңни йоқ қилишқа йаки муқимлиқи вә параванлиқиға зийан селишни мәқсәт қилған барлиқ һәрикәтләр мувәппәқийәткә еришәлмәйду» дәп җаваб бәргән.

хоңкоң гәрчә хитайға қарашлиқ болсиму, әмма өзиниң пули, тили, қанун системиси вә кимлики бар. районниң мудапиәси вә ташқи сийасити хитайға қарайдиған башқуруш түзүми «бир дөләт, иккихи хил түзүм» дейилмәктә.



مۇناسىۋەتلىك خەۋەرلەر