boliwiye namayishchiliri adalet yürüshi qildi

türkiye awazi radiyosi xewiri: öktichiler we armiyening bésimi bilen hoquqidin istépa bergen pirézidént éwo moralés (Evo Morales) ning ornigha waqitliq pirézidént bolghan jénayné anéz (Jeanine Anez) gha qarshi namayish ötküzülgen él alto shehiri (El Alto) de, xewpsizlik küchliri bilen bolghan sürkilishte jénidin ayrilghan toqquz namayishchi üchün paytext sukréda murasim we piyade yürüsh ötküzüldi.

minglarche kishi qatnashqan we jénidin ayrilghanlarning yettisining méyiti toshulghan adalet yürüshi, weqeler yüz bergen él alto shehiridin bashlinip, paytext sukréning merkizidiki meydanghiche dawamlashti. «adalet telep qilimiz», «anéz yoqalsa tinchliq kélidu» dégendek shoarlar towlanghan yürüsh, sukré sheher meydanigha kelgende saqchi-eskerlerning tosqunluqigha uchridi.

saqchilar namayishchilargha ikki saetke yéqin tosqunluq qildi. chiqqan sürkilishlerde, bir kichik qiz balini öz ichige alghan töt kishining yenggil yarilanghanliqi, sekkiz kishining tutulghanliqi bildürüldi.

boliwiye xewpsizlik küchliri 19-noyabir waqitliq pirézidént anézning istépa bérishini telep qilghan sabiq pirézidént moralésning qollighuchiliri namayish qilghan él alto shehiridiki sénkata mehelliside tinitish élip barghan idi. chiqqan weqelerde toqquz kishi jénidin ayrilip, 60 tin artuq kishi yarilanghan idi. buning bilen, boliwiyede 800 din artuq kishi yarilanghan zorawanliq dolqunlirida jénidin ayrilghanlar sani 33 ke chiqqan idi.