қалин америкиниң сүрийә алаһидә вәкили билән көрүшти

җумһур рәислик сарийи байанатчиси ибраһим қалин америка қошма иштатлириниң сүрийә алаһидә вәкили җәймс җефрей билән көрүшти.

қалин америкиниң сүрийә алаһидә вәкили билән көрүшти

түркийә авази радийоси хәвири: истанбулдики җумһур рәислик сарийи долмабаһчә ишханисида ахбарат васитилириға йепиқ һаләттә ишқа ашурулған вә тәхминән икки саәт давамлашқан учришишқа, америка қошма иштатлириниң әнқәрә баш әлчиси дәйвид саттерфелдму қатнашти.

учришишта, җумһур рәис рәҗәп таййип әрдоған билән америка қошма иштатлири пирезиденти доналд трампниң 13 – нойабир күни вашингтонда ишқа ашурулидиған учришишиға тәййарлиқ қилиш хизмәтлири, сүрийәниң шималий қисмидики өзгиришләр, әнқәрә – вашингтон оттурисида һасил қилинған «сүрийә келишими», даешқа қарши күрәш, бихәтәр район, идлибниң вәзийити, сүрийә киризисини сийасий йоллар арқилиқ һәл қилиш басқучиниң тәрәққийати вә сүрийә асасий қанун комитетиниң паалийәтлири қатарлиқ мәсилиләр һәққидә  музакирә елип берилди. бирләшкән дөләтләр тәшкилати хәвпсизлик кеңишиниң 2254 – номурлуқ қарариға асасән, сүрийә асасий қанун комитетиниң паалийәтлирини дәрһал тамамлиши вә сүрийәдә очуқ - ашкара, адил вә әркин сайлам өткүзүлүшиниң зөрүрлүки тәкитләнди؛ бихәтәр район бәрпа қилиш мәсилиси тоғрулуқ 17 – өктәбир күни түркийә – америка қошма иштатлири оттурисида һасил қилинған келишимгә асасән һәмкарлиқни йәниму күчәйтишниң наһайити зор әһмийәткә игә икәнлики қәйт қилинди؛ түркийәниң даеш вә п к к/й п г/п й д қатарлиқ террорлуқ тәшкилатлириға қарши  күрәш қилиш ирадисиниң қәтийлики йәнә бир қетим оттуриға қойулди.

җефрей пайтәхт әнқәрәдики учришишлири даирисидә, түркийә дөләт мудапиә министири һулуси ақар тәрипидин қобул қилинған, һәмдә түркийә ташқи ишлар министирлиқи вәкиллири биләнму бир йәргә җәм болғаниди.



مۇناسىۋەتلىك خەۋەرلەر