ئالتە دۆلەت سۈرىيە ئاساسىي قانۇن كومىتېتىنى قوللىدى

تۈركىيە ئاۋازى رادىيوسى خەۋىرى: ئامېرىكا تاشقى ئىشلار مىنىستىرلىقى ئالتە دۆلەت تاشقى ئىشلار مىنىستىرلىرىنىڭ ئورتاق يازما بايانات ئېلان قىلىپ، سۈرىيە ئاساسىي قانۇن كومىتېتىنى قوللىغانلىقىنى بىلدۈردى.

باياناتتا، ب د ت باش كاتىپى ئانتونىيو گۇتېرس بىلەن ب د ت سۈرىيە ئالاھىدە ۋەكىلى گېيىر پېدېرسېن (Geir Pedersen) نىڭ، سۈرىيە سۈرىيە مەسىلىسىدە كۆرسىتىۋاتقان تىرىشچانلىقلىرىنىڭ قىزغىن قارشى ئېلىنىدىغانلىقى ئەسكەرتىلدى.  باياناتتا مۇنداق دېيىلدى:

«ب د ت نازارىتى ئاستىدا سۈرىيەدە ئەركىن ۋە ئادىل سايلاملارنىڭ ئۆتكۈزۈلۈشىگە ئىمانىيەت يارىتىپ بېرىدىغان بىخەتەر ۋە بىتەرەپ مۇھىتنى بەرپا قىلىش تىرىشچانلىقلىرىنى قوللايمىز. ب د ت خەۋپسىزلىك كېڭىشىنىڭ 2254-نومۇرلۇق قارارىنى ئىجرا قىلىش كېرەك.»

باياناتتا يەنە، ئىدلىبتە ئۇزۇن مۇددەتلىك ئۇرۇش توختىتىشنى كاپالەتكە ئىگە قىلىش چاقىرىق قىلىنىش بىلەن بىرگە: «سۈرىيە كىرىزىسىنى ھەربىي يولدىن ھەل قىلىش مۇمكىن ئەمەس. پەقەت ب د ت خەۋپسىزلىك كېڭىشىنىڭ 2254-نومۇرلۇق قارارى رامكىسىدا سىياسىي جەھەتتىن ھەل قىلىش چارىسى تېپىش مۇمكىن» دېيىلدى.

سۈرىيەنىڭ يېڭى ئاساسىي قانۇنىنى تۈزىدىغان ئاساسىي قانۇن كومىتېتىنىڭ ئەزالىرى، ب د ت نازارىتى ئاستىدا ئىككىنچى قېتىم بىر يەرگە توپلاندى. كومىتېتنىڭ بىرىنچى يىغىنى چارشەنبە كۈنى (2019-يىلى 30-ئۆكتەبىر) ب د ت نىڭ جەنۋەدىكى ئىشخانىسىدا ئېچىلدى.