rusiye xewpsizlik kéngishining «<tinchliq buliqi> herbiy herikiti» ni toxtitish chaqiriqining aldini aldi

türkiye awazi radiyosi xewiri: melumatlargha qarighanda, rusiye amérika qoshma ishtatliri teripidin birleshken döletler teshkilati xewpsizlik kéngishige sunulghan, <tinchliq buliqi> herbiy herikitini toxtitish chaqiriqi orun alghan we türkiyening bixeterlik endishilirini diplomatik yollar arqiliq hel qilish meqset qilinghan ortaq bayannamining élan qilinishgha yol qoymighan.

bayannamide, türkiyening bu herikitidin we bu heriket keltürüp chiqarghusi insaniy we bixeterlik terepliridin endishe qiliniwatqanliqi, jümlidin  bu heriketning térrorluq teshkilati daéshqa qarshi  küreshte qolgha keltürülgen algha ilgirileshlerge ziyan yetküzidighanliqi ilgiri sürülgenidi.

süriyelik köchmenlerning öz yurtigha bixeter, shan – sheripi qoghdalghan we xelqara kishilik hoquq ehdinamisige riaye qilinghan halda qaytishini ishqa ashurushning zörürlüki tekitlengen bayannamide, barliq terepler puqralarni qoghdash, tosalghusiz, bixeter we daimiy insanperwerlik yardem paaliyetlirini keng qanat yaydurushqa chaqiriq qilinghanidi. süriyening igilik hoquqi, musteqilliqi birliki we zémin pütünlükini qoghdashning zörürlüki qeyt qilinish bilen bir waqitta, süriye kirizisini herbiy yollar arqiliq emes, eksiche birleshken döletler teshkilati xewpsizlik kéngishining 2254 – nomurluq qararigha asasen hel qilinishining muhimliqi eskertilgenidi.

amérika qoshma ishtatliri sunghan bayannamining aldinqi küni sunghan bayannamigha oxshimasliqi diqqet qozghidi. aldinqi künidiki bayannamide, türkiyening «<tinchliq buliqi> herbiy herikiti» ni toxtitish chaqiriqi yoq idi. shuning bilen bir waqitta, türkiyening bixeterlik endishilirining qanunluq ikenliki tekitlengenidi.

igilinishiche, birleshken döletler teshkilati xewpsizlik kéngishining ortaq bayanname élan qilalishi üchün 15 eza döletning birdek awaz bilen qarar maqullishigha toghra kélidiken.