украина җо байдин вә оғлини тәкшүрүш тоғрисида байанат елан қилди

түркийә авази радийоси хәвири: украина баш тәптиши руслан рйабошапка американиң пирезидент намзат намзати җо байдин билән оғли хантер байдинни тәкшүрүш материйаллириға қарап чиқилғанлиқини билдүрүп: «тәкшүрүш мусаписиға тәсир көрситиш мәқситидә украиналиқ йаки чәт әллик сийасәтчиләр маңа бесим қилмиди» деди.

у пайтәхт кийевдә өткүзүлгән ахбарат елан қилиш йиғинида, украинаниң енергийә ширкити вә хантер байдин мудирийәт әзаси болған бурисма (Burisma) ға мунасивәтлик тәкшүрүш материйаллириға қарап чиқилғанлиқини әскәртип: «буниңдин бурун баш тәптиш мәһкимиси тәкшүргән материйаллар, қанунсиз қилмишларни байқаш мәқситидә қайта қарап чиқилмақта» деди.

у тәкшүрүш мусаписидә бесимға учримиғанлиқини әскәртип: «тәкшүрүш мусаписиға тәсир қилиш үчүн украиналиқ йаки чәт әллик сийасәтчиләр маңа бесим қилмиди» деди.

украина парихорлуққа қарши туруш тәптиш мәһкимисиниң мудири назар холоднитский (NazarHolodnitskiy), 2017-йили украинаниң енергийә ширкити вә хантер байдин мудирийәт әзаси болған бурисмаға мунасивәтлик тәкшүрүш ишлириниң ахирлашқанлиқини билдүрүп: «җо байдин болсун йаки оғли хантер байдин болсун сорақ қилинмиди. һечқандақ испат тепилмиған вә икки йил давам қилған тәкшүрүш ахирлашти» деди.

америка пирезиденти доналд трамп түнүгүн (3-өктәбир) украина билән хитайниң җо байдин вә оғли хантер байдинни тәкшүрүши керәкликини ейтқан иди.

2019-йили ийулда трамп билән украина пирезиденти владимир зеленский оттурисида елип берилған талаш-тартишлиқ телефон сөһбити, америка конгрәсидики демократларниң трампни вәзиписидин қалдуруш үчүн тәкшүрүш башлишиға сәвәб болған иди.

пирезидент трампниң зеленский билән болған телефон сөһбитидә, украинаниң җо байдинниң оғлини тәкшүрүшини тәләп қилғанлиқи илгири сүрүлгән иди.