хоңкоң валийси хәлқ билән дийалог өткүзиду

хоңкоң валийси кәррий лам (лиңҗен йө и) ниң җәмийәтниң һәр қайси қатламлиридики кишиләр билән көрүшүп йиғин өткүзидиғанлиқи билдүрүлди.

1275463
хоңкоң валийси хәлқ билән дийалог өткүзиду

түркийә авази радийоси хәвири: хоңкоң валийси кәррий лам һөкүмәткә қарши намайишлар давамлишиватқан бир пәйттә, пәйшәнбә (26-сентәбир) күни җәмийәтниң һәр қайси қатламлиридики кишиләр билән көрүшидиған учришиштин үмидвар икәнликини ейтти.

кәррий лам бу һәқтә елан қилған байанатида, пәйшәнбә күни хәлқ билән учришидиған иҗтимаий дийалог йиғинидин бир қанчә айдин буйан тохтимай давамлишиватқан намайишлар үчүн ейтқанда, дәрһал һәл қилиш чариси болушни күтмәйдиғанлиқини, бирақ бу учришишларниң мурәссә йолидики узун сәпәрдә алдиға қарап ташланған бир қәдәм болушини үмид қилидиғанлиқини қәйт қилди.

у учришишқа 20 миңдин артуқ кишиниң илтимас қилғанлиқини әскәртип, бу кишиләр арисидин ихтийари таллинидиған 150 киши билән көрүшидиғанлиқини билдүрди.

у хоңкоңлуқларниң әрз-шикайәтлирини йәткүзүши вә ихтилапларға чиқиш йоли тепиш үчүн тәшкилләнгән һәммигә ечиветилгән мунбәр болуш алаһидиликкә игә бу учришишниң бекитилгән күнтәртип маддилириниң йоқлуқини билдүрүп, учришишниң тоғра вә сәмимий һалда өзара пикир алмаштуруш билән тинч өткүзүлгән әһвалда мувәппәқийәтлик һесаблинидиғанлиқини ейтти.

бу учришиш өткүзүлгән әһвалда намайишлар башланған 2019-йили ийун ейидин тартип һазирғичә хоңкоң һөкүмити билән хәлқ арисида әмәлгә ашқан тунҗи дийалог болуп қалиду.

хоңкоң алаһидә мәмурий районидики намайишларниң нишанидики җинайәт өткүзгәнләрни қайтуруп бериш қанун тәклип лайиһәси 2019-йили апрел ейида парламентқа сунулған иди. буниңға қарши башланған намайишлар нәтиҗисидә, валий кәррий лам ийул ейида қанун тәклип лайиһәсиниң«өлгәнлики» ни елан қилған иди.

кәррий лам қанун тәклип лайиһәсини «өлди» дәп елан қилған болсиму тохтимай давамлашқан намайишларниң тәсиридә, 2019-йили 4-сентәбирдә қанун тәклип лайиһәсиниң қайтурувелинидиғанлиқини билдүрүп: «һөкүмәт хәлқниң әндишәлирини түгитиш үчүн лайиһәни рәсмий қайтурувалиду» дегән иди.

хоңкоң намайишчилири қанун тәклип лайиһәсиниң қайтурувелинишидин башқа, сақчиларниң намайишлардики зораванлиқлирини тәкшүрүш үчүн мустәқил комитет қурушни, тутуп кетилгән намайишчилар үчүн кәчүрүм елан қилишни, намайишларни «исйан» дәп аташни тохтитишни вә сийасий ислаһатларни қайтидин башлашни тәләп қилмақта.

намайишлар пат-пат намайишчилар билән сақчилар йаки намайишқа қарши һөкүмәт тәрәпдари намайишчиларниң һәр иил сүркилишлиригә сәһнә болмақта.



مۇناسىۋەتلىك خەۋەرلەر