ispaniye saqchiliri kataloniyede toqquz musteqilliq terepdarini tutti
ispaniyening sherqidiki kataloniye aptonom rayonida zorawanliq terepdari bölgünchi bir guruppigha qarshi bashlanghan herikette toqquz kishi tutuldi.
türkiye awazi radiyosi xewiri: ispaniye qoralliq saqchi qisimliri kataloniyede zorawanliq tüsini alghan namayish qilghan bölgünchi «jumhuriyet qoghdinish komitéti» (CDR) namliq teshkilatqa qarshi keng kölemlik heriket bashlidi. térrorluq jinayetlirige mesul dölet sot mehkimisi sotchisining yolyoruqi bilen bashlanghan herikette, toqquz kishi tutuldi.
ispaniye taratqulirining qoralliq saqchi qisim menbelirini asas qilip bergen xewerliride bildürülishiche, jumhuriyet qoghdinish komitétigha eza toqquz kishi kataloniyede zorawanliq tüsini alghan namayishlarni ötküzüsh teyyarliqini qiliwatqanda tutulghan. barsélonani merkez qilip bashlanghan heriket dairiside, 10 jayda tinitish élip bérilghan bolup, partlatquch yasashta ishlitilidighan nurghun matériyallar qolgha chüshürülgen.
jumhuriyet qoghdinish komitétigha qarshi texminen bir yildin buyan dawamlishiwatqan tekshürüshler dairiside tutulghan toqquz kishining, mushu hepte ichide paytext madridtiki dölet sotida sotlinidighanliqi ilgiri sürüldi.
ispaniye asasiy qanun mehkimisi teripidin qanunsiz dep élan qilinghan bolushigha qarimay, 2017-yili 1-öktebirde kataloniyede ötküzülgen musteqilliq référandumigha chétilip aliy sotta sotlanghan we hazirmu tutup turuluwatqan toqquz kataloniyelik siyasetchini öz ichige alghan jemiy 12 kataloniye siyasetchisi heqqidiki höküm, 2019-yili öktebirde élan qilinidu.
ispaniye taratquliridiki xewerlerde körsitilishiche, kataloniye musteqilliq terepdarliri qamaqqa höküm qilinishi perez qiliniwatqan kataloniye siyasetchiliri heqqide sot hökmi élan qilinghandin kéyin, keng kölemlik namayishlargha teyyarliq qilmaqta iken.
