xelqara jemiyet nétanyahuning iyordan wadisi toghrisidiki sözlirige inkas bildürmekte

xelqara jemiyet, israiliye bash ministiri bunyamin nétanyahuning ishghal astidiki gherbiy qirghaqqa jaylashqan iyordan wadisi toghrisidiki bayanatigha arqa – arqidin naraziliq bildürmekte.

xelqara jemiyet nétanyahuning iyordan wadisi toghrisidiki sözlirige inkas bildürmekte

türkiye awazi radiyosi xewiri: xelqara jemiyet, israiliye bash ministiri bunyamin nétanyahuning ishghal astidiki gherbiy qirghaqqa jaylashqan iyordan wadisining amérika dairiliri bilen maslashqan halda «qoshuwélinidighanliqi» toghrisidiki bayanatigha arqa – arqidin naraziliq bildürmekte.

pelestin milliy kéngishi, israiliyening birleshken döletler teshkilati (b d t) ning qararlirigha riaye qilmighanliqini eskertip, israiliyening b d t ezaliiqining közdin kechürülüshini telep qildi.

iyordaniye tashqi ishlar ministiri eymen essefedimu nétanyahuning sözlirining rayonni zorawanliq we toqunushqa ittiridighanliqini eskertti.

islamiy qarshiliq körsitish herikiti – hamas, nétanyahuning bayanatigha «düshmenlik siyasiti» dep baha berdi؛ hamas bayanatchisi fewzi berhum yazma bayanat élan qilip, «nétanyahuning gherbiy qirghaq we iyordan wadisidiki ahalilerni qoshuwélish toghrisidiki bayanatliri réalliqni özgertelmeydu, xelqimiz ishghal we ishghalchining pilanlirigha qarshi küreshlirini toxtatmaydu» dédi.

shiwétsiye tashqi ishlar ministiri an lindé bolsa, bu heqte dölet igilikidiki téléwiziye qanili SVT de israiliye bash ministiri bunyamin nétanyahuning saylam wedilirini eyibleydighanliqlirini bildürüp, «méningche epsuslinarliq bir bayanat. hem yawropa ittipaqi hem xelqara jemiyet, buning xelqara qanungha zit ikenlikini bildürmekte. aldinqi shert ikki döletlik hel qilish charisi bolushi kérek» dédi.

bunyamin nétanyahu tünügün muxbirlarni kütüwélish yighini ötküzüp, gherbiy qirghaqtiki qanunsiz yehudiy mehellilirini israiliyege qoshuwélish üchün amérika pirézidénti donald tramp teyyarlighan «yüz yilning kélishimi» ning misli körülmigen bir purset ikenlikini ilgiri sürgenidi.

u yene, qayta saylinip qalghan teqdirde, qisqa waqit ichide gherbiy qirghaqtiki iyordan wadisini amérika dairiliri bilen maslashqan halda israiliyege «qoshuwalidighanliqi»ni éytqanidi.



مۇناسىۋەتلىك خەۋەرلەر