хәлқара җәмийәт нетанйаһуниң ийордан вадиси тоғрисидики сөзлиригә инкас билдүрмәктә

хәлқара җәмийәт, исраилийә баш министири бунйамин нетанйаһуниң ишғал астидики ғәрбий қирғаққа җайлашқан ийордан вадиси тоғрисидики байанатиға арқа – арқидин наразилиқ билдүрмәктә.

хәлқара җәмийәт нетанйаһуниң ийордан вадиси тоғрисидики сөзлиригә инкас билдүрмәктә

түркийә авази радийоси хәвири: хәлқара җәмийәт, исраилийә баш министири бунйамин нетанйаһуниң ишғал астидики ғәрбий қирғаққа җайлашқан ийордан вадисиниң америка даирилири билән маслашқан һалда «қошувелинидиғанлиқи» тоғрисидики байанатиға арқа – арқидин наразилиқ билдүрмәктә.

пәләстин миллий кеңиши, исраилийәниң бирләшкән дөләтләр тәшкилати (б д т) ниң қарарлириға риайә қилмиғанлиқини әскәртип, исраилийәниң б д т әзалииқиниң көздин кәчүрүлүшини тәләп қилди.

ийорданийә ташқи ишлар министири әймән әссәфәдиму нетанйаһуниң сөзлириниң районни зораванлиқ вә тоқунушқа иттиридиғанлиқини әскәртти.

исламий қаршилиқ көрситиш һәрикити – һамас, нетанйаһуниң байанатиға «дүшмәнлик сийасити» дәп баһа бәрди؛ һамас байанатчиси фәвзи бәрһум йазма байанат елан қилип, «нетанйаһуниң ғәрбий қирғақ вә ийордан вадисидики аһалиләрни қошувелиш тоғрисидики байанатлири реаллиқни өзгәртәлмәйду, хәлқимиз ишғал вә ишғалчиниң пиланлириға қарши күрәшлирини тохтатмайду» деди.

шиветсийә ташқи ишлар министири ан линде болса, бу һәқтә дөләт игиликидики телевизийә қанили SVT дә исраилийә баш министири бунйамин нетанйаһуниң сайлам вәдилирини әйибләйдиғанлиқлирини билдүрүп, «мениңчә әпсуслинарлиқ бир байанат. һәм йавропа иттипақи һәм хәлқара җәмийәт, буниң хәлқара қанунға зит икәнликини билдүрмәктә. алдинқи шәрт икки дөләтлик һәл қилиш чариси болуши керәк» деди.

бунйамин нетанйаһу түнүгүн мухбирларни күтүвелиш йиғини өткүзүп, ғәрбий қирғақтики қанунсиз йәһудий мәһәллилирини исраилийәгә қошувелиш үчүн америка пирезиденти доналд трамп тәййарлиған «йүз йилниң келишими» ниң мисли көрүлмигән бир пурсәт икәнликини илгири сүргәниди.

у йәнә, қайта сайлинип қалған тәқдирдә, қисқа вақит ичидә ғәрбий қирғақтики ийордан вадисини америка даирилири билән маслашқан һалда исраилийәгә «қошувалидиғанлиқи»ни ейтқаниди.



مۇناسىۋەتلىك خەۋەرلەر