yawropa ittipaqi xongkongdiki tereplerni keng dairilik diyalog ötküzüshke chaqirdi

yawropa ittipaqi, xitayning xongkong alahide memuriy rayonida jinayetchilerni xitaygha qayturup bérishini mezmun qilghan qanun layihesining emeldin qaldurulushini telep qilip dawamlishiwatqan namayishlar toghrisida bayanat élan qildi.

yawropa ittipaqi xongkongdiki tereplerni keng dairilik diyalog ötküzüshke chaqirdi

türkiye awazi radiyosi xewiri: yawropa ittipaqi, xitayning xongkong alahide memuriy rayonida jinayetchilerni xitaygha qayturup bérishini mezmun qilghan qanun layihesining emeldin qaldurulushini telep qilip dawamlishiwatqan namayishlarning axirlishishi üchün «keng dairilik diyalog ötküzüsh» ke éhtiyaj barliqini bildürdi.

yawropa ittipaqi tashqi munasiwetler we bixeterlik siyasetliri aliy wekili fédérika mogérini yazma bayanat élan qilip, 2 aydin buyan köp sanda puqraning yighilish we namayish ötküzüsh hoquqidin paydilanghanliqini, biraq yéqinqi künlerde zorawanliq weqelirining köpiyip qalghanliqini eskertip, «mötidil heriket qilish, zorawanliqtin saqlinish we jiddiychilikni peseytish üchün téz qedemlerning tashlinishi nahayiti muhim» dégenlerni qeyt qildi.

«barliq tereplerni öz ichige alidighan sighdurushchan we keng dairilik diyalog ötküzülüshi zörür» dégen mogérini, xongkong xelqining asasiy heq – hoquqliridin behrimen bolushida xitay hökümitiningmu mesuliyiti barliqini qeyt qildi.

xitayning xongkong alahide memuri rayoni, xongkongda üstidin hökümname élan qilinghan yaki eyiblengen kishilerning xitaygha, makaw (awmin) alahide memuri rayonigha we teywenge qayturup bérilishini asanlashturidighan qanun layihesi we buninggha qarshi ötküzülgen namayishlar bilen dunya küntertipining aldinqi qataridin orun almaqta.

mezkur qanun layihesi 3 – aprélda parlaméntqa sunulghanidi.

layihe siyasiy jinayetchilerni öz ichige almisimu, 7 milyon 400 ming nopusluq xongkongluqning köp qismi kishilerning xitayning qanun sistémisi astida xalighanche nazaret astigha élinishidin, adil bolmighan sotlash musapiliri, hetta qiyin – qistaqqa duch kélishidin endishe qilidiken.


خەتكۈچ: yawropa , namayish , xongkong

مۇناسىۋەتلىك خەۋەرلەر