yemen parchilinish xewpige duch keldi

türkiye awazi radiyosi xewiri: yemende ereb birleshme xelipiliki qollighan jenub waqitliq kéngishi edenge qarashliq ettuwahi shehiride toplinip bayanat élan qildi.

bayanatta: «jenubtiki xelqning nishani musteqil fédératsiye jenub dölitini qaytidin qurush bolup, bu qetiy tallashtin arqigha qedem tashlanmaydu» déyildi.

bayanatta, buni téximu kéchiktürüsh we uzartishning jenubtiki xelqning kimlikige munasiwetlik ijabiy özgirishlerni élip kelmeyla qalmastin, belki rayon we dunyada téximu chong xeterlerni, hel qilish mumkin bolmaydighan mesililerni peyda qilidighanliqi eskertildi.

bayanatta yene, jenub waqitliq kéngishining bayanatida, seudi erebistan bilen ereb birleshme küchlirige, eden kirizisida körsetken tirishchanliqliri, ularning nazariti astida ziddiyetlishiwatqan tereplerge qilinghan diyalog chaqiriqliri sewebidin teshekkür éytildi.

seudi erebistan rehberlikidiki ereb birleshme küchlirini qollaydighanliqliri tekitlengen bayanatta, rayonda iranning kéngeymichilikige we husiylargha dawamliq qarshiliq körsitilidighanliqi tekrarlandi.

bayanatta, jenub waqitliq kéngishining ereb birleshme küchi, pars qoltuqi hemkarliq kéngishi, b d t yaki ereb ittipaqining her qandaq qismining nazariti astida ötküzülidighan diyalogqa qatnishishqa teyyar ikenliki qeyt qilindi.

musteqilliq terepdari jenub waqitliq kéngishige qarashliq hizam emni qisimliri töt kün dawamlashqan étishishlar netijiside, 10-awghust edendiki maashik pirézidéntliq sariyi bilen istratégiyelik dölet organlirini ishghal qilip, sheherni kontrolluqigha kirgüzgen idi.

seudi erebistanning paytexti riyadta turuwatqan yemen pirézidénti abdurebbu mensur hadi rehberlikidiki qanunluq hökümet, ereb birleshme xelipilikining qollishi astidiki hizam emni qisimlirining herikitini «herbiy özgirish» dep baha bermekte.