rusiye amérikaning wénézuélagha yürgüzüwatqan émbargosini eyiblidi

türkiye awazi radiyosi xewiri: rusiye tashqi ishlar ministirliqining bayanatchisi mariya zaxarowa (Mariya Zaharova) ministirliqning tor bétide, amérikaning wénézuélagha yürgüzüwatqan émbargoliri toghrisida yazma bayanat élan qildi.

u bayanatida, amérika pirézidénti donald trampning wénézuélaning amérikadiki barliq mal-mülüklirini tonglatqan pirézidéntliq qararnamisini imzalighanliqini tenqid qildi.

u amérika siyasetchilirining wénézuélaning qanuniy pirézidénti nikolas maduroni xelqning qollawatqanliqini körelmigenlikini eskertip: «washington wénézuélada hakimiyetni qolgha kirgüzüsh üchün élip bérilghan nurghun qétimliq herbiy özgirishlerdin kéyin, siyasiy-iqtisadiy weziyetning téximu yamanlishidighanliqigha ishinidu. amérikaning rehimsizlerche yürgüzüwatqan émbargoliri sewebidin wénézuéla xelqi, bolupmu késeller we yashanghanlar chong tesirge uchraydu. mutexessilerning déyishiche, émbargo sewebidin wénézuélada 40 ming kishi jénidin ayrildi. xelqning birdinbir jinayiti washington telep qilghan rehberni qollighanliqidur» dédi.

u rusiyening amérikaning wénézuélagha yürgüzgen émbargosigha qarshi ikenlikini bildürüp: «amérika wénézuélaning qanuniy hökiümitige qarshi iqtisadiy térrorizm bilen zerbe bérishni dawamlashturuwatidu. wénézuéla hökümitige qarshi yürgüzüwatqan émbargolirini toxtitishi kérek» dédi.

amérika pirézidénti donald tramp tünügün (6-awghust) imzalanghan qararname bilen, wénézuélaning amérikadiki barliq mal-mülükliri tonglitildi. buning bilen, amérikadin karakas bilen béjirilidighan iqtisadiy resmiyetlermu resmiy toxtitilghan boldi.

amérika hökümiti wénézuéla pirézidénti nikolas maduroni qanuniy pirézidént dep étirap qilmaydu. 2019-yili yanwar éyida özini «waqitliq pirézidént» dep élan qilghan öktichilerning rehbiri xuen guaydoni yéqindin qollap kelmekte.