awam palatasi seudi erebistangha qoral sétishni chekleydighan qanunni testiqlidi

türkiye awazi radiyosi xewiri: amérika awam palatasining tashqi munasiwetler komitétining bashliqi éliyon éngél (Eliot Engel) palatada élip bérilghan seudi erebistangha qoral sétip bérishining aldini alidighan üch qanun teklipige bélet tashlanghanliqi toghrisida bayanat élan qildi.

u pars qoltuqidiki amérika ittipaqdashlirining yemendiki iranning qollishi astidiki husiylar teripidin tehdit astida ikenlikini bilidighanliqlirini, biraq yüz bériwatqan kishilik hoquq depsendichiliklirigimu qarap turalmaydighanliqlirini tekitlidi.

u: «rayondiki hemkarliqimiz ittipaqdashlirimiz teripidin qilinghan puqralarning qetliam qilinishigha köz yumidighanliqimizni bildürmeydu. béshimizni burap pirézidéntning kongrege küch körsitishige ruxset qilidighanliqimiznimu bildürmeydu. tramp hökümiti qimmet qarashlar namida tik turmisa, kongre tik turushi kérek, yeni turidu» dédi.

jumhuriyetchilerning töt wekilimu qollighan qanun teklip layihesi, buningdin burun oxshash layiheni ikki qétim ret qilghan trampqa üchinchi qétim ewetilidu. qanun teklip layihesi amérika pirézidénti donald trampning seudi erebistan siyasitige küchlük qarshiliq, dep qaralghan idi.

 qanun teklip layiheside, el qaidege qarshi urush qilghanlardin bashqa, yemendiki urushqa qatnashqan yaki urushqa tesir körsetken barliq amérika herbiy qisimlirining 30 kün ichide chékinishi telep qilinidu.

amérika hökümitining yemende dawamlishiwatqan urushta seudi erebistangha qiliwatqan yardemliri uzun waqittin buyan kongrede talash-tartish qozghap kéliwatqan idi. buninggha oxshaydighan qanun teklip layiheliri 2018-yili dékabir éyida we 2019-yili féwral éyida awam palatasigha sunulghan idi.