американиң сәуди әрәбистанға әскәр әвәтидиғанлиқи оттуриға чиқти

түркийә авази радийоси хәвири: с н н (CNN) ниң америка дөләт мудапиә министирлиқидики икки әмәлдарниң дегәнлирини асас қилип бәргән хәвиридә көрситилишичә, американиң сәуди әрәбистан пайтәхти рийадтики шаһзадә султан һава армийә базисиға 500 әскәр әвәтиши күтүлмәктә икән.

мәсул әмәлдарлар айропилан линйәси вә айродурумни йахшилаштин башқа, бир данә «вәтәнпәрвәр» намлиқ башқурулидиған бомба батарийәси үчүн қилиниватқан дәсләпки тәййарлиқлар үчүн сани аз болған бир һәрбий қисим вә арқа сәп хадимлириниң һазирму базида тәййар һаләттә икәнликини ейтти.

хәвәрдә көрситилишичә, америка конгрәсигә сәуди әрәбистанға әскәр әвәтиш мәсилисидә рәсмий мәлумат берилмигән, бирақ бир әмәлдар с н н ға мәзкур мәсилә бойичә келәр һәптә байанат елан қилишниң пиланланғанлиқини ейтқан.

мидилбурий (Middlebury) хәлқара тәтқиқатлар иниститути шәрқий асийа йадро қорали тарқилишиниң алдини елиш лайиһәсиниң директори җефрей левис (Jeffrey Lewis) ниң билдүрүшичә, планет ләбс (Planet Labs) исимлик ширкәтниң сүний һәмраһдин тартилған сүрәтлири 2019-йили ийун ейиниң оттурилирида һава армийә базисидики дәсләпки америка әскәрлири вә арқа сәп хадимлирини көрситип беридикән.

рәсимләрни тәтқиқ қилған җефрей левисниң қәйт қилишичә, ийун ейиниң ахирида вә бу ай (ийул) ниң бешида тартилған сүрәтләр, америка қисимлири орунлишиштин бурунқи базида қилиниватқан тәййарлиқлардин дирәк беридикән.

америка дөләт мудапиә министир вәкили патрик шейнахан (Patrick Shanahan) өткән ай парс қолтуқиниң нөвәттики вәзийити үстидә тохталғанда, оттура шәрққә запас миң әскәр әвәтилидиғанлиқини елан қилған, бирақ бу әскәрләрниң қайси дөләткә әвәтилидиғанлиқи һәққидә мәлумат бәрмигән иди.

парс қолтуқидики әң чоң дөләт һесаблинидиған сәуди әрәбистанда һазир американиң һәрбий базиси йоқ. пайтәхт рийадтики «шаһзадә һава армийә базиси» американиң райондики әң муһим һәрбий базилардин бири иди. бирақ, америка 2003-йили мәзкур базидики әскәрлирини қатарға йөткәп, сәуди әрәбистандики һәрбий мәвҗутлуқини ахирлаштурған иди.