германийә дөләт мудапиә министири йавропа иттипақи комитетиниң рәиси болди

йавропа парламенти германийә дөләт мудапиә министири урсула фондер лайен (Ursula von der Leyen) ниң йавропа иттипақи комитетиниң рәислик вәзиписигә тәйинлинишини тәстиқлиди.

1236894
германийә дөләт мудапиә министири йавропа иттипақи комитетиниң рәиси болди

түркийә авази радийоси хәвири: йавропа парламенти омумий кеңиши фирансийәниң страсбург (Strasbourg) шәһиридә топланди вә йавропа иттипақи комитетиниң рәиси үчүн беләт ташлиди. 383 авазниң қоллиши, 327 авазниң қарши туруши вә 22 авазниң һоқуқидин ваз кечиши билән, германийә дөләт мудапиә министири урсула фондер лайен йавропа иттипақи комитетиниң рәислик вәзиписигә сайланди.

йавропа иттипақиға әза дөләтләрниң рәһбәрлири йавропа иттипақи комитетиниң рәислик вәзиписигә узунға созулған талаш-тартиш нәтиҗисидә, урсула фондер лайенни көрсәткән иди. урсула фондер лайен йавропа иттипақи комитетиниң рәислик вәзиписигә тәйинләнгән тунҗи айал болуп қалди. сийасәткә 43 йешида башлиған вә германийәниң тунҗи айал дөләт мудапиә министири болған урсула фондер лайен 2013-йилидин бери бу вәзиписини өтәп келиватқан иди.

урсула фондер лайен белгийәдә туғулған болуп, 13 йашқа киргәндә аилиси германийәгә көчүп кәлгән. у һазир 61 йаш, баш министир ангела меркел рәһбәрлик қиливатқан хиристийан демократ иттипақи партийәси (CDU) ниң әзаси. хановер (Hanover) тиббий факултетини пүттүргән. йәттә пәрзәнти бар. немисчә, финрансузчә вә ингилизчә тиллирини билиду.  хиристийан демократ иттипақи партийәси йавропа иттипақи комитетидики биринчи партийә болған йавропа хәлқ партийәси (EPP) тәркибидә һәрикәт қилиду.

урсула фондер лайен «йавропа армийәси» қурушни тәшәббус қилиду. узун вақиттин буйан министирлиқниң хизмәтчиси болмиған мәслиһәтчиләрни ишләткәнлики үчүн, униң үстидә тәкшүрүш барлиқи мәлум.

йавропа иттипақи қурулмиси ичидә қанун чиқириш мусаписини башлайдиған вә иттипақниң иҗра қилиш оргини һесаблинидиған, иттипақниң хамчотини вә пирограммилирини иҗра қилишқа вә мәмурий җәһәттин назарәт қилишқа мәсул болған йавропа иттипақи комитетиниң рәислики муһим орунларниң бирси. йавропа иттипақи комитетида, комиссарлардин башқа, йавропа иттипақи хизмәтчилиридин тәшкил тапқан 25 миң кишилик мәмурий тәшкилат бар.

йавропа иттипақи комитетиниң һазирқи рәиси лийуксембурлуқ җаңкер (Jean-Claude Juncker) ниң вәзипә өтәш муддити 2019-йили 31-өктәбирдә ахирлишиду.

урсула фондер лайен 2019-йили 1-нойабир вәзиписини башлайду.



مۇناسىۋەتلىك خەۋەرلەر