«pelestin dawasi iraqning dawasidur»

iraq bash ministiri adil abdulmehdi, pelestin dawasining oxshashla iraqning dawasi ikenlikini dédi.

«pelestin dawasi iraqning dawasidur»

türkiye awazi radiyosi xewiri: iraq bash ministiri adil abdulmehdi, iraqning pelestin mesilisige tutqan pozitsiyeni özgertmigenlikini we amérikaning «esirlik kélishimi»ge qetiy qarshi ikenlikini éytti.

abdulmehdi pelestinlik mensebdéshi muhemmed ishtiyye bilen paytext baghdadta qoshma axbarat élan qilish yighini ötküzdi.

pelestin heyiti bilen sanaet, iqtisad we sodigha oxshash her qaysi saheler üstide muzakire ötküzgenliklirini éytqan abdulmehdi, pelestin dawasining oxshashla iraqning dawasi ikenlikini we adaqqiche pelestin dawasini qollaydighanliqini bildürdi.

bash ministir abdulmeh mundaq dédi: «iraqning pelestin dawasigha tutqan pozitsiyesi özgermeydu we bashtin-axir oxshash bolup kéliwatidu, pelestindiki barliq qanunsiz köchmen turalghu jaylirini étirap qilmaymiz, esirlik kélishim pilanigha qetiy qarshimiz, bu pilanni ijra qilmaqchi bolghanlarmu buning muweppeqiyetlik bolushidin guman qilishqa bashlidi.»

amérika pirézidént donald trampning israiliye-pelestin mesilisige «chare»tépish meqsitide otturigha qoyghanliqi ilgiri sürülgen «esirlik kélishim pilani»ning tepsilati éniq bolmighan bolsimu, xelqara taratqulirida bu toghruluq bezi melumatlar élan qilinmaqta.

pilanda quddusining hemmisini israiliyege bérish we iyordan deryasidiki qanunsiz köchmen yehudiy turalghu jaylirining köp qismini étirap qilishqa oxshash pelestinliklerning menpeetige ziyanliq maddilar bar.

pilanda yene israiliye teripidin yurt-makanliridin sürgün qilinghan 6 milyon pelestinlikning yurtigha qaytip kélishi mesilisi toghruluq héchqandaq mezmun yoq.

pelestin dölet reisi mehmud abbas teripidin «21-esirdiki bimenlik»dep teriplengen mezkur pilanda, bezi iqtisadiy yardemlerdin sirt pelestinlik xelqige paydiliq birmu mezmun yoqliqi bildürülmekte.

amérika bashchiliqida behreyinning sahbixanliqida 25-26 iyun künliri ötküzülgen «tereqqiyat üchün tinchliq»namliq iqtisad yighinining, amérikaning israiliye-pelestin mesilisige «chare»tépish meqsitide otturigha qoyghan «esirlik kélishim»pilani dairisidiki tunji qedem ikenliki bildürülgenidi.

yighingha qatnashmighan pelestin hökümiti rayon döletlirini yighinni bayqut qilishqa chaqirghan bolsimu behreyin, seudi erebistan, iyordaniye, misir, ereb birleshme xelipiliki, qatar we marakesh qatarliq döletler, yighingha wekil ewetkenidi.

iraq bolsa yighingha qatnashmighan döletler qataridin orun alghanidi.


خەتكۈچ: pelestin , iraq

مۇناسىۋەتلىك خەۋەرلەر