ئىران بېيجىڭنىڭ «بىر خىتاي» سىياسىتىنى قوللايدىغانلىقىنى بىلدۈردى
ئىران تاشقى ئىشلار مىنىستىرلىقى خىتاي بىلەن ئامېرىكا قوشما ئىشتاتلىرى ئوتتۇرىسىدىكى تەيۋەن مەسىلىسىدە بېيجىڭنىڭ «بىر خىتاي» سىياسىتىنى قوللايدىغانلىقىنى بىلدۈردى.
تۈركىيە ئاۋازى رادىيوسى خەۋىرى: ئىران تاشقى ئىشلار مىنىستىرلىقى باياناتچىسى ئابباس مۇسەۋى، بۇ ھەقتە ئېلان قىلغان يازما باياناتىدا، ئامېرىكا قوشما ئىشتاتلىرى بىلەن ئەنگلىيەنى خىتاينىڭ ئىچكى ئىشلىرىغا ئارىلىشىش بىلەن ئەيىبلەپ مۇنداق دېدى: «ئامېرىكا قوشما ئىشتاتلىرى بىلەن ئەنگلىيەنىڭ خىتاينىڭ ئىچكى ئىشلىرىغا قارىتا ھەر تۈرلۈك مۇداخىلىسىنى، يېقىندىن بۇيانقى تەيۋەن ھەم خوڭكوڭدا تاشلاۋاتقان ئىغۋاگەرلىك قەدەملىرىنى قاتتىق ئەيىبلەيمىز، بېيجىڭنىڭ <بىر خىتاي> سىياسىتىنى ئاداققىچە قوللايمىز.»
خىتاي تەيۋەنگە قورال - ياراغ ساتقان ئامېرىكا شىركەتلىرىگە ئېمبارگو يۈرگۈزىدىغانلىقىنى جاكارلىغانىدى.
خىتاي تاشقى ئىشلار مىنىستىرلىقى باياناتچىسى گېڭ شۇاڭ، ئامېرىكا قوشما ئىشتاتلىرىنىڭ تەيۋەنگە قورال - ياراغ سېتىپ بېرىش ئارقىلىق خەلقئارا قانۇننى ۋە خەلقئارا پىرىنسىپلارنى جىددىي شەكىلدە ئاياغ ئاستى قىلغانلىقىنى، بېيجىڭنىڭ «بىر خىتاي» پىرىنسىپىنى دەپسەندە قىلىپ، خىتاينىڭ ئىگىلىك ھوقۇقى ۋە بىخەتەرلىك ھەق – ھوقۇقلىرىغا زىيان يەتكۈزگەنلىكىنى ئىلگىرى سۈرگەنىدى.
تەيۋەن رەھبىرى سەي يىڭۋېن پەيشەنبە كۈنى ئامېرىكا قوشما ئىشتاتلىرىدا زىيارەتتە بولغان، ئۇنىڭ بۇ زىيارىتى خىتاينىڭ نارازىلىقىنى قوزغىغانىدى.