трамп нопус санашта пуқралиқ соали сораштин ваз кәчти

америка пирезиденти доналд трамп 2020-йили елип берилидиған нопус санаш ишлириға пуқралиқ соали қошуштин ваз кәчкәнликлирини елан қилди.

трамп нопус санашта пуқралиқ соали сораштин ваз кәчти

түркийә авази радийоси хәвири: пирезидент доналд трамп америка җәмийитидә зор талаш-тартиш қозғиған пуқралиқ соалидин ваз кәчти.

пирезидент трамп ақсарайда бу һәқтә байанат елан қилип, нопус санашқа пуқралиқ соали қошуш ишлиридин ваз кечилгән болсиму, барлиқ қануний йоллардин пайдилинип кимләрниң америка пуқраси икәнлики йаки әмәсликини ениқлап чиқидиғанлиқлирини билдүрди. у мундақ деди:

«20 милйард доллар хәҗләп нопус санаймиз, бирақ кишиләрдин америка пуқраси йаки әмәсликини сорийалмаймиз, бу наһайити күлкилик.»

у мәзкур мәсилидә пирезидентлиқ қарари чиқириш һоқуқиниң барлиқини әскәртип, һазирчә бу йолни таллиғанлиқини қәйт қилди.

у 2020-йили елип берилидиған нопус санашта, чоқум пуқралиқ соали болушни тәләп қилғанлиқлирини елан қилған, әмма бу қарар сотниң тосқунлуқиға учриған иди.

америка алий соти нопус санашқа пуқралиқ соали қошуш сәвәбиниң ениқ әмәсликини, шуңа пуқралиқ соали қошушниң мувапиқ әмәсликини елан қилған иди.

америка әдлийә министирлиқиму байанат елан қилип, алий сотиниң қарариға бойсунидиғанлиқини, буниңға асасән келәр йили елип берилидиған нопус санашқа қатнишидиғанларниң пуқралиқиға мунасивәтлик һечқандақ соал соралмайдиғанлиқини қәйт қилди.

пирезидент трамп нопус санашқа пуқралиқ соали қошуш һәққидә пирезидентлиқ қарарнамиси чиқиришни пиланлиғанлиқини билдүргән иди.

америкада 10 йилда бир қетим мәмликәт миқйасида өйләргә почта әвәтиш арқилиқ елип баридиған нопус санаш ишлириға, сода министирлиқиға қарашлиқ нопус идариси мәсул болиду. 2020-йилидин башлап нопус санаш ишлириниң көпинчисиниң интернет арқилиқ болидиғанлиқи билдүрүлмәктә.



مۇناسىۋەتلىك خەۋەرلەر