trampning nopus sanashqa özgertish kirgüzidighanliqi ilgiri sürülmekte

türkiye awazi radiyosi xewiri: amérika pirézidénti donald trampning 2020-yili élip bérilidighan nopus sanashqa kirgüzülüshi munazire qozghighan puqraliq soali üchün pirézidéntliq qararnamisi chiqiridighanliqi ilgiri sürüldi.

aksiyos (Axios) xewerler torining témigha munasiwetlik menbelerdin neqil élinghan xewiride körsitilishiche, amérika aliy soti nopus sanashqa puqraliq soalini kirgüzüshni muwapiq dep qarimighan bolup, tramp hökümiti adwokatlirining bolsa, soalning nopus sanashqa kirgüzülüshi üchün bashqa yollar üstide izdenmekte iken.

pirézidént tramp 2020-yili élip bérilidighan nopus sanashta, choqum puqraliq soaligha orun bérish kéreklikini élan qilghan, biraq sotning tosqunluqigha uchrighan idi.

amérika aliy sotighiche yétip barghan dewa musapisining axirida, «nopus sanashqa puqraliq soalini qoshush sewebi éniq emes, shuning üchün soal muwapiq dep qaralmidi» dégen höküm chiqqan idi.

edliye ministirliqining adwokati kéyt béyli (Kate Bailey) yazma bayanatida, aliy sotning mezkur qararigha boysunidighanliqlirini bildürüp, uninggha asasen kéler yili élip bérilidighan nopus sanashqa qatnishidighanlardin puqraliq ehwali heqqide héchqandaq soal soralmaydighanliqini eskertken, biraq pirézidént tramp tünügün (4-iyul) twittérda bayanat élan qilip, soaldin waz kéchiligenliki toghrisidiki xwerlerni ret qildi.

amérikada her 10 yilda bir qétim öylerge pochta arqiliq ewetilgen jedweller bilen élip bérilidighan nopus sanash ishlirigha, soda ministirliqigha qarashliq nopus idarisi mesul bolidu.

2020-yilidin bashlap nopus sanash musapisining köpining intérnét arqiliq élip bérilidighanliqi qeyt qilinmaqta.