ruhani amérika émbargolirining yuqiri chekke yetkenlikini éytti

iran pirézidénti hesen ruhani amérikaning irangha yürgüzüwatqan émbargolirining tesir küchini yoqatqanliqini bildürdi.

ruhani amérika émbargolirining yuqiri chekke yetkenlikini éytti

türkiye awazi radiyosi xewiri: u paytext téhranda ötküzülgen ministirlar kéngishi yighinidin kéyin, amérika émbargoliri üstide toxtaldi. u bügün (12-iyun) irangha yétip kelgen yaponiye bash weziri shinzu abi bilen we ete (13-iyun) qirghizistan paytexti bishkekte ötküzülidighan shangxey hemkarliq teshkilati yighinida muhim uchrishishlarni élip baridighanliqini bildürdi. u mundaq dédi:

«amérikaning dölitimizge qiliwatqan bésimliri yuqiri chekke yetti, emma émbargolarning küchi emeliyette yoq bolush aldida. émbargolar we bésimlar tesir küchini yoqatti, buningdin kéyin téximu shundaq bolidu.»

u amérikaning émbargoliri yürgüzülüwatqan bolsimu, ehwallirining yaxshi ikenlikini, biraq buning barliq mesililerning hel qilinghanliqini bildürmeydighanliqini eskertip: «amérikaning dölitimizge yürgüzüwatqan bu xildiki émbargoliri tarixta héchqachan körülüp baqmidi. b d t yoli bilen dölitimizge qarshi yürgüzülgen émbargolar bilen amérikaning bügünki émbargolirini sélishturush mumkin emes» dédi.

u 10-iyun (düshenbe) téhranni ziyaret qilghan gérmaniye tashqi ishlar ministiri hayko maasning özige nahayiti ochuq qilip, amérikaning xata qilghanliqi toghrisidiki qarishini eskertkenlikini qeyt qildi.

u: «bizge yamanliq qilmaqchi bolghanlarni, heq-hoquq, adalet we muzakire üstilige tartimiz, shundaqla xata qiliwatqanliqlirini qobul qilishqa mejbur qilimiz. buningdin burun ölchemsiz söz qilghan bolsa, hazir mötidil qilidighan boldi. kirgen xata yoldin keynige chékinidu, buningda héchqandaq guman yoq» dédi.



مۇناسىۋەتلىك خەۋەرلەر