yawropa ittipaqi: amérika – iran otturisidiki sürkilish endishe peyda qiliwatidu
yawropa ittipaqi komitéti amérika qoshma ishtatliri bilen iran otturisidiki sürkilishning endishe peyda qiliwatqanliqini bildürdi.
türkiye awazi radiyosi xewiri: yawropa ittipaqi komitétining bayanatchisi maja kosijankik, ammiwi ortaqlishish tor béti Twitter sehipiside élan qilghan bayanatida, amérika qoshma ishtatliri pirézidénti donald trampning ammiwi ortaqlishish tor béti Twitter sehipiside élan qilghan, «eger iran urush qilishni xalisa, bu iranning weyran bolushi hésablinidu» teriqisidiki bayanatigha alaqidar soallargha jawab bérip mundaq dédi: «bu heqte men bir nerse déyelmeymen, lékin mesilige keng dairilik halda nezer tashlighinimizda, rayonning téximu köp muqimsizliqqa éhtiyaji yoqluqini körüwalghili bolidu. derweqe, bu mesilini biz hemishe tekitlep kéliwatimiz. palaketning aldini élish üchün türlük ighwagerliklerdin yiraq turushqa, sürkilishni azytish üchün her jehettin tirishchanliq körsitishke toghra kélidu.»
birleshken döletler teshkilati bash katipining bayanatchisi stéphan dujarrich kündilik muxbirlarni kütüwélish yighinida qilghan sözide, amérika qoshma ishtatliri bilen iran otturisidiki barghanséri ewj élip kétiwatqan sürkilishning tolimu endishilik ikenlikini tekitlep mundaq dédi: «barliq tereplerni sürkilishni ewj alduruwétidighan bayanatlarni azaytishqa chaqirimiz. chünki, meyli sahediki paaliyetler bolsun, meyli semimiy bayanatlar bolsun, rayonning weziyiti nahayiti murekkep bolghanliqi üchün, barliq özgirishlerni xata chüshinip qélish éhtimalliqi intayin yuqiri. uning üstige, bu rayonning weziyitini téximu murekkepleshtürüwétishi mumkin. bashqiche éytqanda, bu rayonni muqimsizliq patqiqigha paturup qoyushi mumkin.»
