liwiye milliy birlik hökümiti qisimliri tirablus etrapidiki bezi jaylarni qolgha kirgüzdi

türkiye awazi radiyosi xewiri: liwiye milliy birlik hökümiti qisimliri yazma bayanat élan qilip, général hafter küchliri bilen shiddetlik toqunush bolghan xelqara tirablus ayrodurumining bir qanche kilométir jenubigha jaylashqan essebie we sukessebt rayonlirining köp qismining qolgha kirgüzülgenlikini uqturdi.

bayanatta, bu rayonlarning hafter küchlirining ghiryan we terhune sheherliri bilen qesr bin ghashir we essebie rayonliri arisidiki arqa sep yollirigha xewp shekillendüridighanliqi qeyt qilindi.

essebie rayoni, ghiryan bilen terhune sheherliri arisidiki arqa sep yoli üstige jaylashqan bolup, bu yerdin hafter küchliri orunlashqan qesir bin ghashir rayonigha, u yerdin kona ayrodurum, hille elfurqan, wadi errebi eyn zara bilen paytextning jenubidiki urush nuqtilirigha ötkili bolidu.

liwiyening sherqidiki eskiriy kühlerning lidiri général xelife hafter, paytext tirablusni qolgha kirgüzüsh üchün 4 – aprélgha hujumgha ötüsh buyruqi chüshürgen, buninggha qarshi liwiye milliy birlik hökümiti qisimliri «ghezeb wolqini» herbiy herikitini bashlighanidi.

2011 – yilidin buyan qanuniyliq kirizisi dawamlishiwatqan liwiyede, xelqaraning étirap qilishigha érishken milliy birlik hökümiti bilen hafterge qarashliq küchler otturisida bashlanghan toqunushlar üch heptidin buyan dawam qilmaqta.