siri lankidiki térrorluq hujumlirida ölgenlerning sani barghanche ashmaqta
siri lankida chérkaw we méhmansaraylargha qilinghan adem bomba hujumlirida ölgenlerning sani 359gha chiqti.
türkiye awazi radiyosi xewiri: siri lankida pasxaliya bayrimi tebrikliniwatqan esnada chérkaw we méhmansaraylargha qilinghan adem bomba hujumlirida ölgenlerning sani 359gha chiqti.
siri lanka sheherlik saqchi idarisi bayanatchisi ruwan gunasékara teripidin bu heqte élan qilinghan bayanatta, pasxaliya murasimliri esnasida chérkaw we méhmansaraylargha qilinghan adem bomba hujumlirida ölgenlerning sanining éship bériwatqanliqi eskertildi.
bayanatchi gunasékara hujumlarda hayatidin ayrilghanlarning sanining 359gha yetkenlikini bildürdi.
hujumdin kéyin élip bérilghan keng kölemlik zerbe bérish heriketliride tünügün kéche 18gumandarning tutqun qilinghanliqini éytqan bayanatchi ruwan gunasékara, hazirghiche térrorluq hujumlirigha chétishliqi barliqidin guman qilinghan 58 shexsning tutqun qilinghanliqini bildürdi.
tutqun qilinghan gumandarlarning kimlik we qaysi döletke tewe ikenliki heqqide melumat bermigen gunasékara, tünügün tutqun qilinghan 40 kishining siri lankiliq ikenlikini éytqanidi.
siri lankida 21-aprél etigende kochchikadédiki antoni, katanadidki sébastiyan we battikalodadiki meryem ana qatarliq chérkawlar bilen paytext kolombodiki besh yultuzluq shangrilila, kinnamon grand we kingsburi qatarliq méhmanxanilargha adem bomba hujumi élip bérilghanidi.
térrorluq hujumliridin kéyin paytext kolomboning déhiwala rayonidiki bir méhman kütüsh orni bilen dématogodiki bir köwrükke yéqin jaydimu partlash weqesi meydangha kelgenidi.
bildürülüshiche, 359 adem ölüp 500 din artuq adem yarilanghan térrorluq hujumlirining jawabkarliqini térrorluq teshkilati daésh üstige alghan.
