liwiyediki toqunushlarda 75 adem öldi

türkiye awazi radiyosi xewiri: liwiyening paytexti tiropilidiki toqunushlarda bir hepte ichide jemiy 75 adem öldi.

dunya sehiye teshkilati liwiye wekili jafer hüseyin, birleshken döletler teshkilatining jenwe ishxanisida liwiyening nöwettiki weziyiti üstide toxtaldi.

paytext tiropili etrapida 5-aprélda bashlighan toqunushlarning künsayin ulghiyiwatqanliqini éytqan hüseyin, rayonda bir hepte ichide 75 ademning ölüp 323 ademning yarilanghanliqini bildürdi.

jafer hüseyin tünügün bir sehiye xadimining yarilanghanliqini, bimarlarni élip mangghan bir jiddiy qutquzush mashinisining hujumgha uchrighanliqini éytti.

tiropili etrapidiki toqunushlarning sheher merkizige qarap kéngiyiwatqanliqini éytqan hüseyn, toqunushlarda téximu köp ademning ölüp kétishidin endishe qiliniwatqanliqini bildürdi.

hüseyin toqunushlar tüpeyli 6000din artuq ademning yurt-makanlirini tashlap kétishke mejbur bolghanliqini éytti.

liwiyening sherqidiki herbiy qisimlarning qomandani hafter, paytext tirablusni qolgha kirgüzüsh üchün 4-aprélda hujum buyruqi chüshürgende, liwiyediki xelqara muresse hökümitige tewe qoralliq qisimlirimu qomandan hafterge qarshi qayturma hujumgha ötti.

hafter qisimlirining 14-apréldin 16-aprélghiche bolghan ariliqta liwiyede b d t ning nazariti astida ötküzülidighan «memliketlik diyalog yighini»din ilgiri hujumgha ötüshi alahide diqqet qozghighanidi.

2011-yildin buyan siyasiy kiriziske sehne bolup kéliwatqan liwiyede, xelqara teripidin étirap qilinghan xelqara muresse hökümiti bilen général hafterge qarashliq qisimlar toqunush ichide turmaqta.