ھىندونېزىيەدە يۈز بەرگەن سۇ ئاپىتى ئېغىر تالاپەت يەتكۈزدى

تۈركىيە ئاۋازى رادىيوسى خەۋىرى: ھىندونېزىيە جىددىي ئەھۋاللارغا تاقابىل تۇرۇش قوماندانلىق مەركىزىنىڭ باياناتچىسى سۇتوپو پۇرۋو نۇگروھو، سۇ ئاپىتىدە ئېغىر تالاپەتكە ئۇچرىغان جاۋا ئۆلكىسىگە قاراشلىق باندۇڭ شەھىرى ۋە ئەتراپىدىكى رايونلاردىن 700 كىشىنىڭ بىخەتەر جايلارغا ئورۇنلاشتۇرۇلغانلىقىنى، پۈتكۈل ئاپەت رايونىدا 24 مىڭ 813 كىشىنىڭ تالاپەتكە، 8 مىڭ 271 قۇرۇلۇشنىڭ زىيانغا ئۇچرىغانلىقىنى ئەسكەرتىش بىلەن بىر ۋاقىتتا، 22 – ئاپرېلغىچە جىددىي ھالەت ئېلان قىلىنغان رايوندا، ئاپەتكە ئۇچرىغانلارغا ياردەم بېرىش پائالىيەتلىرىنىڭ داۋاملىشىۋاتقانلىقىنى تەكىتلىدى.

ھىندونېزىيەنىڭ پاپۇئا ئۆلكىسىدە ئالدىنقى ئايدا يۈز بەرگەن سۇ  ئاپىتىدە 100 دىن ئارتۇق كىشى قازا قىلغانىدى.

ئىگىلىنىشىچە، تىروپىك بەلۋاغ ئىقلىمىغا كىرىدىغان ۋە پەسىللىك يامغۇر مىقدارى كۆپ بولغان ھىندونېزىيەدە يىلبويى سۇ ۋە يەر كۆچۈش ئاپەتلىرى يۈز بېرىپ تۇرىدىكەن.