қатар һөкүмити американиң голан егизлики қарари һәққидә агаһландурди

қатар һөкүмити американиң голан егизликигә мунасивәтлик чиқарған қарарини «хәтәрлик ақивәтләр» ни пәйда қилиши мумкин дәп агаһландурди.

1175303
қатар һөкүмити американиң голан егизлики қарари һәққидә агаһландурди

түркийә авази радийоси хәвири: қатар «QNA» агентлиқиниң бу һәқтики хәвиридә қәйт қилинишичә, шура мәҗлисиниң әһмәт бин абдуллаһ ал мәһмутниң башчилиқида чақирилған һәптилик йиғинида, американиң голан егизлики қарари музакирә қилинған.

йиғиндин кейин елан қилинған йазма байанатта, американиң голан егизлики үстидә «исираилийәниң игилик һоқуқи» ни етирап қилғанлиқи әйибләнди вә мәзкур қарарниң қәтий қобул қилинмайдиғанлиқи тәкитләнди.

байанатта мундақ дейилди:

«американиң қарари, хәлқаралиқ қанунға, б д т келишимигә вә б д т хәвпсизлик кеңишиниң мунасивәтлик қарарлириға хилап. охшаш вақитта йәнә, голан егизликиниң сүрийәниң земини икәнликидәк һәқиқәтни өзгәртәлмәйду.»

американиң ғәйрий рәсмий қарариниң хәтәрлик ақивәтләрни пәйда қилиши мумкинлики агаһландурулған байанатта, болупму бу қәдәмниң тинчлиқ мусаписини бузғунчилиққа учритидиғанлиқи вә район муқимлиқиға тәсир көрситидиғанлиқи әскәртилди.

байанатта, адил, каң даирилик вә узун муддәтлик тинчлиқниң, исираилийә пәқәт 1967-йили ишғал қиливалған әрәб земинлиридин чекингәндә вә пайтәхти қуддус болған пәләстин дөлити қурулғанда әмәлгә ешиши мумкинлики билдүрүлди.

америка пирезиденти доналд трамп 2019-йили 25-март ақсарайда исираилийә баш министири нетанйаһу билән көрүшкәндә, «голан егизликидә исираилийәниң игилик һоқуқи барлиқини рәсмий етирап қилғанлиқи» ни җакарлиған пирезидентлиқ қарарнамисини имзалиған иди.

сүрийә земини болған голан егизлики 1967-йилидин буйан исираилийәниң ишғалийити астида турмақта.



مۇناسىۋەتلىك خەۋەرلەر