xitaydiki partlashta ölgenlerning sani 64 ke chiqti
xitaydiki partlashta ölgenler sanining 64 ke chiqqanliqi we yaridarlar sanining 617 ikenliki uqturuldi.
türkiye awazi radiyosi xewiri: xitayning sherqidiki jiyangsu ölkiside bir ximiye zawutida yüz bergen partlashta ölgenlerning sani 64 ke chiqti.
xitay merkizi téléwziyesining xewiride, jiyangsu ölkisige qarashliq yenching shehirining shiangshü nahiyesidiki «Jiangsu Tianjiayi Chemical Co. Limited» namliq shirketke tewe ximiye zawutida yüz bergen partlashta, ölgenler sanining 64 ke chiqqanliqi we yaridarlar sanining 617 ikenliki uqturuldi.
shiangshü nahiyeside peyshenbe küni shu yerning waqti saet 14:48 ötkende yüz bergen partlashta yaridar bolghanlar sheherdiki 16 doxturxanida balnéstqa élinghan idi.
ölgenlerdin 26 kishining kimliki éniqlanghanliqi we yaridarlardin 94 kishining ehwalining intayin éghir ikenliki bildürüldi.
partlash texminen 2.2 bal yer tewrigendek tesir yaratti. weqedin kéyin 176 ot öchürüsh aptomobili we 1000 gha yéqin ot öchürüsh xadimi rayongha yollandi. weqe yüz bergen jaygha yéqin mekteplerning hemmisi taqiwitildi. ximiye zawuti etrapida olturushluq kishilerning hemmisi bashqa jaygha yötküwétildi. az dégendimu 90 öy ziyangha uchridi.
xitay dölet reisi shi jinping we bash ministiri likichang weqedin kéyin yaridarlarning qutquzulishi we ziyanning amal bar töwenlitilishi üchün kéreklik xizmetlerning qilnishigha dair buyruq chüshürdi. xitayning alaqidar ministirliqliri we organlirini maslishishchanliq bilen bu weqeni etrapliq tekshürüp, bir terep qilishqa hemde yüz bergen weqedin ders élishqa chaqiriq qildi.
«Jiangsu Tianjiayi Chemical Co. Limited» shirkitining intérnét bitide élan qilinghan melumatlargha asaslanghanda, 2007 - yilida qurulghan bu ximiye zawuti 30 din köprek zeherlik madde we ot alghuch maddilarni ishlepchiqiridiken.
