yéngi zélandiye dölet téléwiziyesi jüme ezanini biwasite tarqatti

türkiye awazi radiyosi xewiri: yéngi zélandiyening kristchorch shehiridiki ikki jamede 50 ademning hayatidin ayrilishini we 50 ademning yarilinishini keltürüp chiqarghan térrorluq hujumidin kéyinki tunji jüme küni musulmanlargha hemdem bolush üchün, dölet igilikidiki yéngi zélandiye radiyosi we yéngi zélandiye téléwiziyesi jüme namizi ezinini neq meydandin biwasite ulap tarqatti.

yéngi zélandiyening kristchorch shehiridiki alnur we linwud jameliride hayatidin ayrilghanlar üchün yéngi zélandiyening barliq sheherliride xatirilesh paaliyiti ötküzüldi.

yéngi zélandiye dölet téléwiziye qanili – TVNZ we RNZ teripidin biwasite tarqitilghan murasimlarda jüme namizi ezinimu biwasite tarqitildi. ezandin kéyin térrorluq hujumi qurbanlirigha hörmet bildürüp 2 minut sükütte turuldi.

térrorluq hujumidin kéyin sözliri, yolgha qoyghan tedbirliri we térror qurbani musulman puqralirigha qilghan yaxshi muamililiri bilen bashqilarning yuqiri bahasigha érishken yéngi zélandiye bash ministiri jasinda ardérn, kristchorchning hagléy baghchisida ötelgen jüme namizigha qatnashti.

namazdin ilgiridiki qisqa sözini bir hedis bilen bashlighan jasinda ardérn, «muhemmed peyghember dédiki, <özara méhri – shepqet, merhemet we hésdashliq qilish bilen insanlar bir bedenge oxshaydu. bedenning herqandaq bir yéri aghrisa, pütün beden aghriq hés qilidu> yéngi zélandiye siler bilen birgidur. musibette bir birmiz» dégenlerni qeyt qildi.

linwud jamesi imami alabi letif zirullah teripidin oqulghan ezandin kéyin xutbe oqughan alnur jamesi imami gamal fuda, bash ministir jasinda ardérn, hökümet we yéngi zélandiyeliklerge özliri bilen hemnepes bolghanliqi üchün minnetdarliq bildürdi.

térrorning renggi, dini we irqi bolmaydighanliqini tekitligen fuda, «yéngi zélandiyening yéngilmes ikenlikini namayan qilduq. dunya bizde söygü we birlikning ülgisini körelidi. dilimiz sunuq, biraq biz sunup ketmiduq (yéngilmiduq)» dédi.

dölet miqyasida ötküzülgen murasimlarda bash ministir jasinda ardérnning chaqiriqigha asasen, köp sanda yéngi zélandiyelik ayal simwol xaraktérlik yaghliq artip musulmanlar bilen hemnepes ikenlikini namayan qildi.