түркийә, ислам һәмкарлиқ тәшкилати йиғиниға йеңи зеландийәниму тәклип қилди
ислам һәмкарлиқ тәшкилатиға әза дөләтләр истанбулда йиғин чақирип, йеңи зеландийәдики икки җамәгә қилинған террорлуқ һуҗумини муһакимә қилиду.
түркийә авази радийоси хәвири: түркийә, буниңдин илгири 22 – мартта истанбулда чақирилиши пиланланған ислам һәмкарлиқ тәшкилати иҗраийә комитети йиғиниға барлиқ әза дөләтләр билән бирликтә йеңи зеландийәниму тәклип қилди.
очуқ иштирак қилиш шәклидә ечилидиған йиғинға һазирғичә ислам һәмкарлиқ тәшкилатиға әза 20 гә йеқин дөләт министир дәриҗисидә қатнишидиғанлиқини җәзмләштүрди.
йиғинға ислам һәмкарлиқ тәшкилатиға әза дөләтләрдин иран, ливийә, һиндонезийә, пакистан, афғанистан, судан, қатар, ливийә вә сомали ташқи ишлар министири дәриҗисидә иштирак қилиду. буниңдин башқа бир қатар дөләтләр башқа министирларни, мәхсус вәкилләрни йаки баш әлчиләрни әвәтидиғанлиқини билдүрди.
җумһур рәис рәҗәп таййип әрдоғанниң йиғинниң нөвәтчи рәиси болуш сүпити билән истанбулдики йиғинниң иштиракчилириға сөз қилиши пиланланмақта.
җумһур рәис йардәмчиси фуат оқтай билән ташқи ишлар министири мәвлүт чавушоғлуниң кристчорч шәһиридики икки җамә террорлуқ һуҗумиға учрап 50 адәм һайатидин айрилғандин кейин елип барған йеңи зеландийәдики зийарити җәрйанида, бу дөләтму ислам һәмкарлиқ тәшкилати йиғиниға тәклип қилинди.
йеңи зеландийәниң баш министир йардәмчиси, қошумчә ташқи ишлар министири винстон птерсму етник җамаәтләр министири җеннй селеса билән бирликтә истанбулда чақирилидиған ислам һәмкарлиқ тәшкилати йиғиниға иштирак қилидиғанлиқини билдүрди.
петерс, «бу муһим паалийәт, йеңи зеландийәниң терроризмға қарши турушта вә өзара чүшиниш вә диний кәң қорсақлиқ дегәндәк мәсилиләрни йуқири аваз билән оттуриға қойушта шериклиригә һәмдәм болушиға пурсәт йаритип бериду» дегәнләрни қәйт қилди.
йеңи зеландийәниң җәнубийға җайлашқан кирстчорч шәһиридә 15 – март җүмә күни икки җамә җүмә намизи әснасида 10 минут арилиқ билән террорлуқ һуҗумлириға учрап 50 адәм җенидин айрилғаниди.
