süriyelik musapirlargha 7 milyard dollarliq yardem bérilidu

türkiye awazi radiyosi xewiri: konféranstin kéyin yawropa ittipaqi komitétining insanperwerlik yardem we  jiddiy ehwallargha taqabil turush qomandanliq merkizining mesul ezasi chiristos sitilianidés bilen birleshken döletler teshkilati muawin bash katipi mark lowkok bayanat élan  qildi.

sitilianidés bu heqte qilghan sözide, mundaq dédi: «bu yerdiki wekillerning süriye we köchmenler üchün texminen 7 milyard dollar yardem bérish toghruluq wede bergenlikini bildürgenlikim üchün intayin xushalmen. derweqe, bu wediler choqum paaliyetlerge eks ettürülüshi lazim. türkiye, iyordaniye we liiwan qatarliq süriyelikler üchün her küni ijabiy qedemlerni tashlawatqan döletlerge alahide rehmet éytimen.»

birleshken döletler teshkilati muawin bash katipi mark lowkok,  konféransta qolgha keltürülgen netijilerdin tolimu xursen ikenlikini, chünki bu yardemlerning milyonlarche kishining derdige derman bolidighanliqini qeyt qilish bilen bir waqitta, konféransta, xelqara jemiyetning süriye xelqige keng dairilik yardem bérish iradisini namayen qilghanliqini tekitlep mundaq dédi: «insanperwerlik yardem mesum insanlarning hayatini qutquzup qalidighan we ularning derd – elemlirige biraz melhem bolsimu, emma, bu hergizmu süriye kirizisni hel qilishning charisi bolalmaydu, shunga, süriye kirizisini hel qilish üchün choqum  siyasiy chare tépilishi kérek. aldimizdiki aylarda bu dairide muhim qedemlerning tashlinishigha tilekdashmiz.»

süriyede yü minglarche kishi hayatidin ayrilghan, milyonlarche kishi musapirgha aylinip qalghan, hemde yurt – makanliridin ayrilip qalghan ichki urush 8 yilini arqida qaldurdi.

biryussélda birleshken döletler teshkilati bilen yawropa ittipaqining bashlamchiliqida 12 – 14 – mart künliri chaqirilghan «süriye we rayonning kélechikige alaqidar paaliyetlerni qollash» témiliq konféransqa 50 tin artuq dölettin texminen 80 wekli qatnashti.

konféransqa türkiyege wekaliten tashqi ishlar ministiri mewlüt chawushoghlu ishtirak qildi.