rusiye amérikining wénézuélagha herbiy mudaxile qilidighanliqi toghrisidiki tehditini eyiblidi

türkiye awazi radiyosi xewiri: rusiye tashqi ishlar ministiri sérgéy lawrow, amérika qoshma ishtatlirining wénézuélagha herbiy mudaxile qilidighanliqi toghrisidiki tehditliri heqqide toxtilip, «musteqil bir döletke mudaxile qilish birleshken döletler teshkilati (b d t)  ning belgilimilirige xilaptur» dédi.

rusiye tashqi ishlar ministiri sérgéy lawrow bilen zambiye tashqi ishlar ministiri joé malanji, ikki dölet arisida diplomatik munasiwet ornitilghanliqining 55 – yilini xatirilesh munasiwiti bilen moskwada körüshkendin kéyin qoshma muxbirlarni kütüwélish yighini ötküzdi.

muxbirlarning wénézuéla toghrisidiki soallirigha jawab bergen lawrow, weziyettin endishe qiliwatqanliqini eskertip, «amérikining herbiy mudaxile qilish tehditini öktichiler qollimaqta. musteqil bir döletke mudaxile qilinishi birleshken döletler teshkilati (b d t)  ning belgilimilirige xilaptur» dédi.

u, wénézuéla mesilisining diyalog yoli bilen hel qilinishi kéreklikige isharet qildi.

zambiye tashqi ishlar ministiri malanji bolsa, uchrishishta, ikki dölet arisidiki diplomatik munasiwetler toghrisida sözleshkenliklirini tilgha aldi.