чавушоғлу йавропа иттипақиниң венезуела сийаситини тәнқид қилди

түркийә ташқи ишлар министири мәвлүт чавушоғлу йавропа парламентиниң венезуелада өзини «вақитлиқ пирезидент» дәп елан қилған өктичи рәһбәр хуән гуайдони етирап қилғанлиқи һәққидә байанат елан қилди.

1137242
чавушоғлу йавропа иттипақиниң венезуела сийаситини тәнқид қилди

түркийә авази радийоси хәвири: ташқи ишлар министири мәвлүт чавушоғлу йавропа парламентиниң венезуелада өзини «вақитлиқ пирезидент» дәп елан қилған хуән гуайдони етирап қилғанлиқи һәққидә тохтилип: «бундақ сирттин арилишиш йахши әмәс, мәсилини һәл қилалмайду, бәлки мәсилини техиму чоңқурлаштуриду, һәтта дөләтни ички урушқа сөриши мумкин» деди.

йавропа иттипақи ғәйри рәсмий ташқи ишлар министирлири йиғиниға қатнишиш үчүн руменийә пайтәхти софийәгә йетип барған мәвлүт чавушоғлу, мухбирларниң йиғин башлиништин бурун күнтәртиптики мәсилиләр тоғрисидики соаллириға җаваб бәрди.

у һәр қайси дөләтләрниң тәрәп тутушниң орниға, венезуелада дийалогни вә венезуела билән дийалогни алдинқи орунға қойуши керәкликини әскәртип, түркийәниң бу хилдики қарарларни тоғра дәп қаримайдиғанлиқини билдүрди.

у: «мадуро сайлам билән пирезидент болди. шуңа, һечким венезуела хәлқиниң ирадисигә һөрмәтсизлик қилмисун» деди.

у венезуелада һәқиқәтән мәсилә барлиқини әскәртип, бу мәсилиниң дийалог вә өзара һәмкарлиқ билән һәл қилиниш мумкинликини тәкитлиди. у мундақ деди:

«бөлүнүшниң орниға мәсилини қандақ һәл қилишқа диққәтни мәркәзләштүрсәк, венезуелаға вә венезуела хәлқигә техиму көп йардәм қилған болимиз, шундақла районда нурғун мәсилини оттуридин йоқатқан болимиз.»

у германийә, фирансийә вә әнглийәниң, иранға қарши йолға қойулған америка ембарголирини йиңишни мәқсәт қилған алаһидә сода механизм қуруши һәққидә мундақ деди:

«теииму көп дийалог вә һәмкарлиқ арқилиқ бу мәсилиләрни һәл қилалайдиғанлиқимизға ишинимиз. сода ембарголири пәқәт иранғила әмәс, бәлки йавропа дөләтлири вә йапонийәни өз ичигә алған нурғун дөләтләргә тәсир қилиду. шуңа, американиң бу һәрикитигә қарши йавропа иттипақиниң басқан бу қәдәмлирини иҗабий дәп қараймиз. америка бу қараридин ваз кечиши лазим. биз қайси дөләт болушидин қәтийнәзәр баштин тартип бу хилдики ембарголарға қаршимиз.»

у хели бурунла иранға қарши американиң өз алдиға йолға қойған ембарголарниң нәтиҗигә еришәлмәйдиғанлиқини билдүргәнликлирини әскәртип, бүгүнгичә йавропа иттипақи билән, болупму мушу мәсилидә сийасәтләрниң маслашқанлиқини ейтти.

у руменийәниң партийәләрдин үстүн сийасәт йүргүзүп, түркийәниң йавропа иттипақиға әза болушини изчил һалда қоллап кәлгәнликини хатириләтти. у мундақ деди:

«бу мәзгилдә йавропа иттипақи билән болған мунасивәтлиримизниң техиму нормаллишидиғанлиқиға ишинимиз, учришишлар давамлишиватиду.»

у 15-март күни түркийә-йавропа иттипақи шериклик кеңиши йиғининиң бирйусселда ечилидиғанлиқини билдүрди.

у йиғинда, «сүрийә, хитай, йавропа иттипақи кеңийиш сийасити» қатарлиқ темиларниң музакирә қилинидиғанлиқини әскәртип: «йавропа иттипақиниң башқа саһәләрдикигә охшаш кеңийишкә мунасивәтлик ениқ сийасәт йоқ» деди.

у русийә билән америка оттурисидики «оттура мусапилиқ йадро қорал келишими» ни әмәлдин қалдуруш тоғрисидики бир соалға җаваб бәргәндә, түркийәниң нато әзаси болуш сүпитидә, натониң сийаситини қоллайдиғанлиқини тәкитлиди.

у мундақ деди:

«бүгүнки күнләрдә бу хилдики қийинчилиқларни йиңиш үчүн техиму көп дийалогқа еһтийаҗлиқмиз» деди.



مۇناسىۋەتلىك خەۋەرلەر