«amérikaning xuawéygha tutqan pozitsiyesidin qattiq endishe qiliwatimiz»
xitay tashqi ishlar ministirliqi amérikaning xuawéy guruhigha tutqan pozitsiyesidin qattiq endishe qiliwatqanliqini bildürdi.
türkiye awazi radiyosi xewiri: xitay hökümiti amérika qoshma ishtatlirining téxnologiye shirkiti xuawéy guruhini toxtimay eyiblishidin endishe qiliwatqanliqini bildürdi.
xitay tashqi ishlar ministirliqi bayanatchisi géng shuang bu heqte yazma bayanat élan qilip mundaq dédi: «hökümitimiz amérika edliye ministirliqining xuawéy guruhi maliye ishliri mudiri ming wenju üstidin sot échishidin qattiq endishe qilmaqta.»
amérika qoshma ishtatlirining uzundin buyan küchlük nopuzidin paydilinip bezi xitay shirketlirige hujum qilip kéliwatqanliqini eskertken bayanatchi géng, bu ishning keynide küchlük siyasiy gherez we düshmenlik barliqini ilgiri sürdi.
bayanatchi géng, amérika qoshma ishtatlirini xuawéy bolup bezi xitay shirketlirige bésim qilishtin waz kéchishke we bu shirketlerge adil we biterep muamile qilishqa chaqirish bilen birge, xitay shirketlirining xelqaradiki menpeetlirini pütün küchi bilen qoghdaydighanliqlirini eskertti.
tashqi ishlar ministirliqi bayanatchisi yene, amérika bilen kanada hökümetlirining jinayetchilerni qayturup bérish kélishimini süyistémal qilip kéliwatqanliqlirini, shundaqla yoqilang bahaniler bilen xitay puqralirining qanuniy heq-hoquqlirini éghir derijide depsende qilip kéliwatqanliqlirinimu ilgiri sürdi.
«amérika hökümitini burunraq ming wenjuni tutqun qilish telipidin waz kéchishke we kanadadin qayturup bérishni telep qilmasliqqa, hemmidin muhimi bundaq xata yolda mangmasliqqa chaqirimiz»dégen bayanatchi géng, kanada hökümitini ming wenjuni derhal qoyup bérishke chaqirdi.
xitay sanaet we uchur-alaqe téxnologiye ministirliqi bayanatchisi win kumu, amérika hökümitining ming wenjuni eyibleshlirining adil we exlaqiy bolmighanliqini ilgiri sürdi.
xuawéy guruhi teripidin élan qilinghan bayanatta, amérika hökümitining ming wenjuni qanungha zit qilmishlarni sadir qilish bilen eyiblishining toghra bolmighanliqi eskertilgendin sirt, amérikaning bu eyibleshliridin xuawéy guruhining qattiq epsuslanghanliqi bildürüldi.
xuawéy kirizisi
kanada hökümiti amérika dairiliri teripidin iran émbargolirigha qarshi zit ishlarni qilish bilen eyiblengen xuawéy guruhi maliye ishliri mudiri ming wenjuni, bultur 1-dékabirda wankowér shehiridiki xelqara ayrodurumda tutqun qilidu, bu weqe bir nechche kün ötkendin kéyin taratqularda xewer qilinidu.
xitay dairiliri, ming wenju weqesidin kéyinla xitaydiki kanadaliq karxanchi maykél spawor bilen sabiq diplomat maykél kowrigni dölet bixeterlikige tehdit peyda qilish bilen eyiblep nazaret astigha alidu.
xuawéy maliye ishliri mudiri ming wenju, bultur 12-dékabirda kanadada échilghan sotta 10 milyon kanada dolliri kapalet puli sherti bilen qoyup bérilidu.
amérika edliye minsitirliqimu kanadada tutqun qilinghan xuawéy guruhi maliye ishliri mudiri ming wenjuni 13 xil qilmish bilen eyibleb, uni kanada hökümitidin qayturup bérishni resmiy telep qilidu.
amérika edliye ministirliqi xuawéy guruhining bankilarni yalghan uchurlar bilen teminlesh, qara pul yuyush, pul yötkeshte saqtipezlik qilish we amérikadiki téxnologiye shirkiti « -Mobile » ning soda sirlirini oghrilash bilen eyiblenglikini bildürdi.
xuawéy guruhi maliye ishliri mudiri ming wenjuni amérikagha qayturup bérish üchün échilidighan sot, 6-féwralda bashlinidu.
