җәнубий корейә пирезиденти шималий корейә пирезидентиниң мәктубидин хурсән болғанлиқини билдүрди

түркийә авази радийоси хәвири: җәнубий корейә пирезиденти мон җийаин шималий корейә пирезиденти ким җоңунниң әвәткән мәктубидин толиму хурсән болғанлиқини билдүрди.

йонһап агентлиқиниң бу һәқтики хәвиридә, пирезидент мон җийаинниң шималий корейә пирезиденти ким җоңунниң йадро қоралларни бир тәрәп қилиш тоғрисида бәргән вәдисини орундайдиғанлиқини мәктубида алаһидә әскәртишидин толиму хурсән болғанлиқи билдүрүлди.

мон җийаин пирезидент ким җоңунниң америка пирезиденти доналд трамп билән һасил қилинған келишимни әмәлийләштүрүшкә иҗабий позитсийә тутқанлиқини ейтти.

ким җоңунниң йеңи йилда давамлиқ учришиш вә корейә йерим арилида тинчлиқ вә параванлиқ бәрпа қилиш үчүн қилған чақириқиға фейсбук адерисидин җаваб қайтурған пирезидент мон җийаин: алдимизда нурғун қийинчилиқ бар, бизму буларни һәл қилиш үчүн зор тиришчанлиқ көрситип келиватимиз, һәр икки тәрәп буниңға иҗабий қараватиду, деди.

пирезидент мон җийаин ким җоңунниң җәнубий корейәни зийарәт қилиш пиланидинму хурсән болғанлиқини алаһидә әскәртип өтти.

җәнубий корейә пирезидентлиқ идариси байанатчиси ким хуйкийум, шималий корейә пирезиденти ким җоңунниң мәктуп арқилиқ пирезидент мон җийаинниң йеңи йилини тәбриклигәнликини вә корейә йерим арилида тинчлиқ вә параванлиқ бәрпа қилиш үчүн һәмкарлишиш нийити барлиқини дегәнликини билдүрди.

җәнубий корейә пирезиденти мон җийаин билән шималий корейә пирезиденти ким җоңун, бу йил 27-апрелда  икки дөләт чеграсиға җайлашқан панмунҗом оқ чиқиришни тохтитиш йезисида көрүшти.

көрүшүштин кейин елан қилинған байанатта, корейә йерим арилини йадро қораллиридин тәлтөкүс тазилаш вә оқ чиқиришни тохтитиш келишимини узун муддәтлик тинчлиқ келишимигә айландуруш үчүн музакирә өткүзүш мәсилисидә келишим һасил қилинғанлиқи уқтурулди.   

икки корейәниң пирезидентлири бу йил апрелдики учришиштин кейин 26-майдиму йәнә көрүшүп икки дөләт оттурисида тинчлиқ орнитиш мәсилиси үстидә музакирә өткүзди.

икки рәһбәр йәнә сентәбирдә пийоңйаңда көрүшүп икки дөләт оттурисидики сүркилишни азайтиш мәсилисидә пикир бирлики һасил қилди. көрүшүштә , икки дөләт оттурисида тинчлиқ орнитиш үчүн һәмкарлиқ орнитишқа келишкән икки пирезидент ортақ хитабнамә елан қилди.

хитабнамидә америка тегишлик қәдәмләрни ташлиған тәқдирдә шималий корейәниңму корейә йерим арилини йадро қораллиридин тазилаш йолида техиму көп тиришчанлиқ көрситидиғанлиқи тәкитләнди.