irandiki sünniy musulmanlar heq-hoquqlirining qayturup bérilishini telep qilmaqta

türkiye awazi radiyosi xewiri: iranning shimaliy xorasan ölkisige jaylashqan erqezi shehiride yashaydighan sünniy musulmanlar jüme namizini islamning étiqad asaslirigha asasen ada qilishni arzu qilidu.

azadsheher nahiyesi türkmen ehli sünnet imami mewlana muhemmed hüseyin gurgich, rayonidiki 30mingdin artuq sünniy musulmanning jüme namizini ehli sünnetning fiqih qaidilirige asasen ada qilish üchün dölettin ruxset telep qilghanliqini bildürdi.

gülistan we shimaliy xorasan feqihler kéngishining ezasi ikenlikini éytqan gurgich, qanunda 10mingdin artuq adem yashaydighan bir sheherde jüme namizining ada qilinishigha ruxset qilinidighanliqini eskertip, dölettin bu qanun boyiche ish tutushini telep qilghanliqini éytti.

iranda sünniyler nopusi zich bolghan sheherlerdiki jame we mesjitlerde ehli sünnetning fiqih qaidilirige asasen jüme namizini ada qilalisimu, lékin nopusi nisbeten az sheherlerde jüme namizini ada qilalmaydu, mesjid salalmaydu.  

sünniyler özlirige tewe ibadet makanliri yoq yerlerde ya jüme namizini ada qilalmaydu yaki shie bir imangha egiship jüme namizini ada qilishqa mejbur bolidu.

texminen 80 milyonluq nopusi bolghan iranda gheyri resmiy melumatlargha asaslanghanda, 15 milyon etrapida sünniy musulman yashaydu, chégra rayonlirida nopusi köprek bolghan sünniyler asasiy qanundiki heq-hoquqlirining bérilishini telep qilip kelmekte.

tengsizlik, shieler bilen oxshash hoquqqa ige bolmasliq we hakimiyettin orun alalmasliq qatarliqlardin narazi bolup kéliwatqan sünniyler, döletning bashqa jaylargha yaritip bergen sharaitlar we pursetlerdin özlirining behriman bolalmaywatqanliqini bildürmekte.

iranda yene bezi sünniy ölimalarning erkin kézip yürüshige yol qoyulmaydu, bezi sheherlerdiki sünniylerge tewe jame we mesjidlerning rémont qilinishigha ruxset qilinmaydu, hetta paytext téhrandiki sünniylerning jame sélishighimu purset bérilmeydu.