kataloniyede ministirlar kéngishi yighinigha naraziliq bildürüldi

türkiye awazi radiyosi xewiri: ispaniyening sherqige jaylashqan kataloniye aptonom rayonida musteqilliqni qollaydighan ijtimaiy teshkilatlar, merkiziy hökümetning barsélonada échilidighan ministirlar kéngishi yighinigha naraziliq bildürüp, yighin échilidighan jaygha baridighan yollarni tosush paaliyitini bashlidi.

ispaniye bash ministiri pédro sanchéz bashchiliqida échilidighan yighingha naraziliq bildürüsh üchün etigende bashlanghan namayishta, 20 ge yéqin yolning qatnishi tosuwétildi. barsélonaning qoshna sheherler bilen qatnishini tosushni meqset qilghan namayishlar dairiside, barsélona we tarragona portliri bilen el prat we réyus ayrodurumining kirish éghizlirimu qismen tosuwétildi.

aptobus shirketliri namayishlar sewebidin barsélona-andorra seperlirini bügün (21-dékabir) bir kün toxtatqanliqini élan qildi.

barsélonadiki oqughuchi jemiyetlirimu ministirlar kéngishi yighinining barsélonada échilishi «ispaniyening kataloniyege qarshi ighwagerchiliki» bolup hésablinidighanliqini ilgiri sürüp, mektepke barmasliqni chaqiriq qildi. bezi ishchilar uyushmiliri bügün ikki saet ishqa barmasliq chaqiriqini élan qildighanliqlirini uqturdi.

shu yer waqti 09:30 da bashlash pilan qilinghan ministirlar kéngishi yighini échilidighan barsélona merkizidiki «Llotja de Mar» binasi etrapida, musteqilliqni qollaydighan ijtimaiy teshkilatlar teripidin «tinchliq» shekilde namayish ötküzülidighanliqi bildürüldi.

ispaniye döletlik saqchi idarisi ministirlar kéngishige naraziliq bildürüsh namayishlirining bixeterlikini we tertipini saqlash üchün qoralliq saqchi qisim hemde kataloniye yerlik saqchiliridin jemiy 9 ming xadimni ajratti. ispaniye döletlik saqchi idarisi tunji qétim kataloniye yerlik saqchiliri bilen döletlik saqchilirining birlikte wezipe öteydighanliqini bildürdi.

saqchilar yollarning qatnishini toxtatqan namayishchilarni waqtinche tosmidi.

ispaniye bash ministiri pédro sanchéz tünügün (20-dékabir) barsélonagha yétip bérip, kataloniye aptonom rayonluq hökümitining pirézidénti kwim torra bilen körüshüp yighin achti.

sanchéz bilen torraning yighinigha, merkiziy hökümet we kataloniye yerlik hökümettin ikkidin kishi hemrah boldi. yighinda, «kataloniye mesilisini démokratik usulda hel qilish üchün ünümlük diyaloglarni bashlash» qararining élinghanliqi élan qilindi. torra bilen sanchézning 2019-yil yanwar éyida yene bir qétim körüshidighanliqi eskertildi.

ispaniyening chong öktichi partiyesi xelq partiyesi (PP) rehbiri pablo kasado bayanat élan qilip, sanchézning kataloniye aptonom rayonluq hökümetning pirézidénti torra bilen «xuddiy bashqa döletning pirézidénti bilen körüshkendek» körüshkenlikini ilgiri sürdi. u yighinni ispaniye üchün: «nomus qilarliq we kemsitkenlik» dédi.