amérikaning émbargo tizimliki kéngeytildi
amérika hökümitining chet ellerdiki saylamlargha qol tiqqanliqi we siber hujumi qilghanliqi sewebidin, rusiye herbiy istixbarat organlirining mesul xadimlirini émbargo tizimlikige kirgüzgenliki bildürüldi.
türkiye awazi radiyosi xewiri: amérika hökümiti dunya miqyasida siyasiy saylamlargha tesir körsetkenliki we dunya anti doping (Anti-Doping) agéntliqigha siber hujumi qilghanliqi sewebidin köpinchisi rusiyening herbiy istixbarat organlirida xizmet qilidighan 14 kishi bilen üch organgha émbargo yürgüzülidighanliqini élan qildi.
engliyede sabiq rus jasusi sérgéy skripal bilen qizigha süyiqest qilghan rusiyelik ikki istixbarat orginining mesul xadiminimu émbargo tizimlikige kirgüzüldi.
amérika maliye ministirliqining bu heqtiki bayanatida, maliye ministirliqining chet el mal-mülki ishxanisining «amérika düshmenlirige qarshi émbargo bilen küresh qilish qanuni» ramkisida, ruslar orun alghan émbargo tizimlikining kéngeytilgenliki bildürüldi.
buninggha asaslanghanda, amérika hökümiti rusiye herbiy istixbarat orginining sabiq xizmetchisi wiktor alékséyéwich boyarkingha, émbargo tizimlikidiki rusiyelik oligark olég déripaska namida paaliyet qilghanliqi üchün émbargo yürgüzüsh qarari élinghan.
bayanatta, 2016-yili boyarkin we déripaskaning qara taghda ötküzülgen saylamlargha, bir siyasiy partiyege iqtisadiy jehettin yardem qilish yoli bilen arilashqanliqi ilgiri sürüldi.
amérikaning émbargo tizimlikige yene, oxshimighan döletlerde ötküzülgen siyasiy saylamlargha qol tiqish meqsitide siber hujumi qilghanliqi sewebidin, rusiye herbiy istixbaratining toqquz xizmetchisimu kirgüzüldi. buningdin burun émbargo tizimlikige kirgüzülgen «intérnét tetqiqat agéntliqi» namliq siber pirogrammilirini yasaydighan rusiye shirkitining «laxta layihesi» dairiside, oxshashla saylamlargha arilishishqa urunush sewebidin «Nevskiy News LLC», «Economy Today LLC» we «Federal News AgencyLLC» shirketlirimu émbargo tizimlikige kirgüzüldi.
aléksandér aléksandrowich malkéwich we éléna alékséwina xusyaynowa qatarliqlarmu yuqiridiki shirketlerge chétishliqi sewebidin émbargo tizimlikige kirgüzüldi.
dunya anti doping agéntliqigha siber hujumi qilghanliqi ilgiri sürülgen rusiyening herbiy istixbarat orginining jasusliri bolghan aléksé morénéts bilen éwgéni sérébriyakoghimu émbargo yürgüzülidighanliqi eskertildi.
engliyede öltürülgen rusiyening sabiq jasusi sérgéy skripal bilen qizigha süyiqest qilghan herbiy istixbarat orgini mesulliridin aléksandér pétrow we ruslan boshirowningmu émbargo tizimlikige kirgüzülgenliki qeyt qilindi.
